ایران تشقی ایشلر وزیرلیگی سۉزلاوچیسی اسماعیل بقایی، ایران طالبان و پاکستان اۉرتهسیدهگی کېسکینلیکنی کمهیتیریش یۉلیده هر قندهی یاردمنی کۉرسهتیشگه تیار اېکنینی ایتدی.
او بو بیاناتنی بوگون (دوشنبه، ۳۱-حمل) اېراننینگ اوشبو ایکّی تامان اۉرتهسیده واسطهچیلیک قیلیشی احتمالی حقیدهگی سوالگه جوابن بیلدیردی.
بقایی شوندهی دېدی: «ایران تینچلیکسېور دولت و بیز چین دلدن منطقهمیزده دایما تینچلیک و برقرارلیک بۉلیشینی ایستهیمیز.»
او مجتبی خامنهای نینگ نورۉز تبریگیگه هم اشاره قیلیب، اونده کۉتریلگن مسألهلردن بیری طالبان و پاکستان اۉرتهسیدهگی ضدیت بۉلگنی همده ایران نینگ کېسکینلیکنی کمهیتیریشگه تیارلیگی بیلدیریلگنینی قید اېتدی.
بقایینینگ قۉشیمچه قیلیشیچه، «شو سبب، بیز بو بارهده قنچهلیک یاردم بېره آلسک، البته یاردم بېرهمیز،» دېدی.
طالبان و پاکستان اۉرتهسیدهگی جنگلر قریب ایکّی آیدن بېری دوام اېتماقده و تامانلر حلی هم دایمي اۉت آچیشنی تۉختهتیش بۉییچه کېلیشووگه اېریشه آلمهگن.
شو بیلن بیرگه، پاکستان بیر وقت نینگ اۉزیده ایران و امریکا اۉرتهسیدهگی تینچلیک مذاکرهلریگه واسطهچیلیک قیلماقده و ایکّی تامان اۉرتهسیدهگی ایلک مذاکرهلرگه مېزبانلیک قیلگن.
