طالبلر باش وزیری ملا محمد حسن آخوند، کابل و مملکتنینگ باشقه شهرلریده شرطلی اوی-جای قوریلیشینی معقولهدی.
طالبان باش وزیری نینگ اداری اۉرین باسرلیگی تامانیدن تقدیم اېتیلگن اوشبو پیشنهادگه کۉره، یشاوچیلر ییریک شهرلرده، جملهدن کابلده «رېجهلشتیریلگن، اما حلی عملگه آشیریلمهگن حدودلر»ده معلوم شرطلر اساسیده اوی قوریشلری ممکن.
قاعدهلرگه بناءً، اهالی قوییدهگی حجتلر اساسیده اوی قوریشی ممکن: شرعي حجت (قباله)، سالیق تۉلهنگنلیک بیلېتی، سودا حجتی و محلي تصدیق حجتی. شونینگدېک، مسجد امامی، ایکّی قۉشنی و محله وکیلی نینگ تصدیغی طلب اېتیلهدی.
طالبان قراریگه کۉره، اوی قورماقچی بۉلگن شخص: شهر رېجهسی عملگه آشیریلگنده بوزیلیشدن کېلهدیگن ضرر اوچون دعوا قیلمسلیک حقیده یازمه مجبوريت بېرهدی؛ اوی فقط یشش اوچون و ماکسیمال اوچ قبتلی، یېرتۉلهسیز بۉلیشی کېرهک؛ قوریلیش جایی یۉللر یاکه تعقیقلنگن حدودلرگه تۉغری کېلمسلیگی لازم.
شونینگدېک، شهر رېجهسی موجود بۉلمهگن حدودلرده هم محلي حاکمیتلر (شهر باشقرمهلری) یوقاریدهگی حجتلر و تصدیقلر اساسیده، یېر تعقیقلنگن حدودگه کیرمسه، اوی قوریشگه رخصت بېریشی ممکن. طالبلرنینگ معلوم قیلیشیچه، «ینگی کابل لایحهسی» اوشبو قرارگه کیریتیلمهگن.
اولر خوفسیزلیک کوچلریگه شهر باشقرمهلریسیز قوریلیش ایشلریگه ارهلشمسلیکنی و تېگیشلی حدودي ادارهلر بیلن همکارلیک قیلیشنی بویورگن.
اېسلهتیب اۉتمیز، طالبان افغانستاننی قَیته اېگهلهگنیدن سۉنگ، کابل و باشقه اَیریم شهرلرده اوی-جای قوریلیشینی تعقیقلهگن اېدی.
سۉنگگی پیتلرده ایران و پاکستاندن میلیونلب مهاجرلرنینگ قَیتیشی یانیده شهرلرده اوی-جای تنقیصلیگی کوچهیگن.
نتیجهده اجاره نرخلری کېسکین آشیب، کۉپلب فقرالر اوی اجارهسینی تۉلهشگه قیینهلهیاتگنی ایتیلماقده.
