امریکا مدافعه وزیرلیگی «افغانستاندن چیقیشنی قَیته کۉریب چیقیش بۉییچه مخصوص هیئت» یوقاری مرتبهلی حربي و فقرالیک رهبرلری بیلن اساسي صحبتلر باسقیچینی یکونلهگنینی معلوم قیلدی.
امریکا مدافعه وزیرلیگینینگ بوگون (جمعه، 28-حمل) تانگیده اعلان قیلینگن بیاناتیده ایتیلیشیچه، جملهدن، جنرال آستین مِیللېر، افغانستاندهگی امریکا و ناتوکوچلری نینگ سابق قوماندانی، جنرال مرک مِیللی، قۉشمه شتب باشلیقلری رئیسی، جنرال کېنت مکنزی، ستنکام سابق قوماندانی، جنرال دېوید برگر، دېنگیز پیادهلری سابق قوماندانی همده جنرال کریستوفر دوناهو، 82-فرقه سابق قوماندانی و افغانستاندن چیققن آخرگی عسکر بیلن صحبت اۉتکزیلگن.
وزیرلیک نینگ قۉشیمچه قیلیشیچه، اوشبو صحبتلردن تشقری، مخصوص تېکشیروو هیئتی تورلی ادارهلردن آلینگن تۉقّیز میلیوندن آرتیق حجتنی همده لوید آستین دوریدهگی وزیرلیک نینگ آلدینگی سعی-حرکتلرینی کۉریب چیققن.
امریکا مدافعه وزیرلیگی بو تېکشیروو «2021-ییل اگوستیده یوز بېرگن واقعهلر حقیدهگی اېنگ کېنگ قمراولی، اېنگ شفّاف و اېنگ حلال حسابات بۉلیشینی» تأکیدلهگن.
وزیرلیک شوندهی دېگن: «بیز جمهور رییس ترامپ و وزیر هېگسېت نینگ تاپشیریغیگه بناءً، تیزیملی و رهبرلیک عامللری طفیلی یوزهگه کېلگن قولهش سببلرینی تۉلیق و آچیق بهالش وظیفهسینی آلدیک. مقصدیمیز قرار قبول قیلیشدهگی خطالرنی انیقلش و بوندهی فاجعه نینگ امریکا تامانیدن ینه تکرارلنیشی نینگ آلدینی آلیش دیر. بیز نینگ وظیفهمیز، دنیادهگی اېنگ قدرتلی اوردو امریکا خلقی آلدیده جوابگر بۉلیشینی تأمینلش دیر.»
مدافعه وزیرلیگی حاضرده «اولکن حجمدهگی حجتلرنی بیرلشتیریش، اولرنی اوّلگی تېکشیروولر بیلن سالیشتیریش و اۉز خلاصهلری همده توصیهلرینی تیارلش» اوستیده ایشلهیاتگنینی، یکوني حسابات اېسه یقین آیلر ایچیده وزیر و امریکا خلقیگه تقدیم اېتیلیشینی بیلدیرگن.
امریکا نینگ افغانستاندن ترتیبسیز چیقیشی و اونینگ آرتیدن اوّلگی حکومت نینگ قولهشی همده طالبان نینگ حاکمیتگه کېلیشی کېنگ تنقیدلرگه سبب بۉلگن.
امریکا جمهور رییسی دونالد ترامپ، بیر نېچه بار افغانستاندن چیقیشنی «فاجعهلی» دېب اتهگن و بو نینگ اوچون سابق جمهور رییس جوبایدننی عیبلهگن.
