امریکا مرکزي قوماندانلیگی (سنتکام)نینگ معلوم قیلیشیچه، دونالد ترامپ بویروغیگه موافق بوگون (دوشنبه، ۲۴-حمل) ایران بندرلریگه کیرووچی و چیقووچی برچه دېنگیز ترانسپورتی حرکتینی قمل قیلیشنی باشلهیدی.
سنتکام بیاناتیده ایتیلیشیچه: «اوشبو قمل بېطرف طرزده برچه دولتلرنینگ کېمهلریگه نسبتاً قۉللنهدی، یعنی ایران بندرلری و ساحل حدودلریگه، جملهدن فارس کۉرفزی و عمان کۉرفزیدهگی برچه بندرلرگه کیرووچی یاکه او یېردن چیقووچی کېمهلرنی قمرهب آلهدی.»
سنتکامنینگ قۉشیمچه قیلیشیچه، اونینگ کوچلری «هرمز بۉغازی آرقهلی ایران بۉلمهگن بندرلرلرگه حرکتلنهیاتگن کېمهلرنینگ اېرکین سوزیشیگه تۉسقینلیک قیلمهیدی.»
امریکا مرکزي قوماندانلیگی، شونینگدېک، قمل باشلنیشیدن آلدین بوگون شرقي وقت بیلن ساعت۱۰:۰۰ده تجاري دېنگیزچیلرگه قۉشیمچه معلوماتلر تقدیم اېتیلیشینی بیلدیرگن.
سنتکام برچه دېنگیزچیلرگه عمان کۉرفزی و هرمز بۉغازیده عملیاتلر وقتیده تېگیشلی دېنگیز آگاهلنتیریشلرینی کوزهتیب باریشنی همده ۱۶کانال آرقهلی امریکا دېنگیز کوچلری بیلن علاقه قیلیشنی توصیه قیلگن.
امریکا جمهور رییسی دونالد ترامپ، ایران بیلن مذاکرهلر موفقیتسیز یکونلنگنیدن سۉنگ، هرمز بۉغازینی قمل قیلیش بۉییچه بویروق بېرگنینی اعلان قیلدی.
او، شونینگدېک، امریکا دېنگیز کوچلری هرمز بۉغازیده ماینلرنی تازهلش عملیاتلرنی باشلشینی ایتدی.
سنتکام اوّلراق اوشبو مملکتنینگ ایکّی ناوشکننی هرمز بۉغازیدن اۉتگنینی و بو سوو یۉلیده ماینپاک اۉپراسیونسی باشلنیشینی معلوم قیلگن اېدی.
ایران سپاه پاسداران، امریکا حربي کېمهلرینینگ هرمز بۉغازیدن اۉتگنینی رد اېتیب، حربي کېمهلرنینگ بو حدودگه یقینلشووی صلحنی بوزیش صفتیده بهالنیشینی و بونگه قطعي جواب بېریلیشینی بیلدیرگن.
