محلي منبعلرگه کۉره، غزنی ولایتی نینگ قرهباغ اولسواللیگیده بیر یاش ییگیت نینگ جسدی تاپیلگن، شونینگدېک، جوزجان ولایتی مرکزیده ینه بیر یاش ییگیت اۉلدیریلگن.
غزنیدهگی منبعلرنینگ ایتیشیچه، نامعلوم طرزده اۉلدیریلگن بیر ییگیتنینگ جسدی بوگون اېرتهلب (شنبه،۲۲ حمل) قرهباغ اولسواللیگینینگ «مُشکی» حدودیدن تاپیلگن. اونینگ کیملیگی حلی انیقلنمهگن و جسدی محلي اهالی تامانیدن کلینیکگه تاپشیریلگن.
باشقه تاماندن، جوزجان ولایتی مرکزیدهگی محلي منبعلرنینگ ایتیشیچه، غلام حیدر اسملی یاش ییگیت پنجشنبه آقشامی (۲۰حمل) شبرغان شهری مرکزیدهگی اوییده «نامعلوم قوراللی شخصلر» تامانیدن اۉلدیریلگن.
حاضرگچه بو جنایتلرنینگ سببی و اجراچیلری انیقلنمهگن.
غزنی و جوزجاندهگی طالبان محلي مسووللری بو قاتللیکلر حقیده حاضرچه ایضاح بېرمهگن.
طالبان قَیته حاکمیتگه کېلگنیدن بېری افغانستاننینگ تورلی ولایتلریده بوندهی نامعلوم قاتللیکلر کۉپ بار قید اېتیلماقده. اکثریت حاللرده بو جنایتلر «نامعلوم قوراللی شخصلر» تامانیدن صادر اېتیلگنی ایتیلهدی، بیراق اولرنی انیقلش و جزالش حقیده کم معلومات بېریلهدی.
