«افغانستان آزادلیک جبههسی» هرات ولایتیده تینچ اهالیگه قیلینگن هجومگه مناسبت بیلدیریب، «بو ولایتده شیعه یشاوچیلریگه قرشی عامهوي هجوملر و قیرغینلر، رادیکال ترور ترماقلری نینگ قۉللب-قوّتلاوی، زمین یرهتیشی، یېنگیللشتیریشی و مالیهلشتیریشی بۉلمهسه، عملگه آشیشی ممکن اېمس؛ بو ترماقلرنینگ ایلدیزی هراتدهگی طالبان گروهی نینگ ساخته حاکمی ادارهسیگه باریب تقهلهدی»، دېدی.
بو جبهه بیاناتیده ایتیلیشیچه، هراتدهگی طالبان حاکمی «شیعه مذهبلرینی تکفیر قیلیش حقیده کتاب یازگن شخص» بۉلیب، سۉنگگی آیلرده «خلقارا تکفیرچی ترور ترماقلری بیلن همکارلیکده» شیعه علمالری و آبرولی شخصلرینی حبسگه آلیش، حقارت قیلیش و قییناققه سالیش حالتلریگه هم علاقهدار بۉلگن.
بیاناتده قۉشیمچه قیلینیشیچه: «طالبان گروهی و اولرنینگ اتفاقچی ترور ترماقلری تامانیدن افغانستانده، خصوصاً هرات ولایتیده شیعه فقرالریگه قرشی هجوملر اوزاق تاریخگه اېگه بۉلیب، طالبان حکمرانلیگی آستیدهگی خلق دایم قۉرقوو، تهدید و جسماني-روحي خوفسیزلیک یۉقلیگی ایچیده یشب کېلماقده.»
جبهه ینه شوندهی دېیدی: «طالبان باشقروویدهگی افغانستان ایچکی، منطقوي و خلقارا درجهدهگی تورلی رادیکال ترور گروهلری اوچون خوفسیز باشپناهگه ایلنگن بۉلیب، حاضرگی کونده بو حدود فقط اېکسترېمیستلر، تکفیرچیلر و اولر نینگ ترغیبات همده جاسوسلیک ترماقلری اوچون خوفسیز مکان حسابلنهدی.»
«افغانستان آزادلیک جبههسی» نینگ تأکیدلشیچه، «طالبلر باشقروویدهگی توزوم آستیده یشهیاتگن تورلی اېتنیک گروهلر، دیني جماعهلر و ضعیف قتلملر هېچ قندهی جسماني و روحي خوفسیزلیککه اېگه اېمس».
تیناوون توشدن کېین قوراللنگن شخصلر هرات ولایتی انجیل اولسواللیگینینگ «دهمیری» قیشلاغیدهگی شیعه زیارتگاهیده تینچ اهالیگه هجوم قیلگن.
طالبان ایچکی ایشلر وزیرلیگی بو هجومده کمیده 7 کیشی هلاک بۉلگنینی و 13 کیشی یرهلنگنینی بیلدیرگن، بیراق محلي منبعلر قربانلر سانی بوندن کۉپراق اېکنینی اَیتماقده.
ایتیلیشیچه، هلاک بۉلگنلر و یرهلنگنلر آرهسیده عیاللر و بالهلر هم بار.
حاضرگچه هېچ بیر شخص یاکه گروه هجوم اوچون جوابگرلیکنی اۉز ذمّهسیگه آلمهگن.
سۉنگگی ییللرده هرات ولایتیده شیعه و هزارهلر بیر نېچه بار نشانگه آلینگن قوراللی هجوملرگه دوچ کېلگن. بعضی حالتلرده بو هجوملر اوچون «داعش» جوابگرلیکنی اۉز ذمّهسیگه آلگن.
