«دېپورت معلوماتلری لایحهسی» تامانیدن اعلان قیلینگن معلوماتلر تحلیلی شونی کۉرسهتهدیکی، امریکا قۉشمه ایالتلری طالبان ینه افغانستانده حاکمیتنی اېگهلهگنیدن سۉنگ، کمیده۱۰۴ نفر باشپناه ایزلاوچینی اوشبو مملکتگه دېپورت قیلگن.
اوشبو آمار ۲۰۲۲ییل اکتوبردن ۲۰۲۶-ییل مارچگچه بۉلگن دورنی قمرهب آلگن «فدرال دېپورت معلوماتلری» تحلیلیگه اساسلنهدی.
«کابل ناو»«اطلاعات روز» گزېتهسی نینگ انگلیس تیلیدهگی بۉلیمی تامانیدن «دېپورت معلوماتلری لایحهسی» اعلان قیلگن معلوماتلر تحلیلیگه کۉره، اوشبو دورده جمی بیر مینگ۱۵۶ نفر افغانستانلیک باشپناه ایزلاوچی امریکا قۉشمه ایالتلریدن دېپورت قیلینگن. اولردن۱۰۴ نفری طالبان نظارتی آستیدهگی افغانستانگه قَیتریلگن، قالگنلری اېسه اوچینچی دولتلرگه یوباریلگن.
مذکور معلوماتلرگه کۉره، ۲۰۲۳-ییلده۲۴۰ ته، ۲۰۲۴-ییلده ۴۷۸ ته و ۲۰۲۵-ییلده۴۰۲ ته دېپورت حالتی قید اېتیلگن.
آمارلرگه کۉره، افغانستان باشپناه ایزلاوچیلرنینگ اکثریتی امریکا چېگرهسیده یاکه اونگه یقین حدودلرده تۉختهتیلگن و قیسقه مدت ایچیده دېپورت قیلینگن. کۉپ حاللرده حبسگه آلیشلر امریکا باجخانه و چېگره حمایهسی خدمتی تامانیدن عملگه آشیریلگن.
معلوماتلرگه کۉره، دېپورتلرنینگ قریب۹۰ فایزی «قبول قیلمسلیک» طایفهسیگه کیرهدی، یعنی شخصلر مهاجرت محکمهسینینگ تۉلیق جریانیگه کیریتیلمسدن، مملکتگه کیریشدن محروم قیلینیب دېپورت قیلینگن.
شونینگدېک، اکثریت حاللرده دېپورت جریانی مأموري و تېزکار طرزده عملگه آشیریلگن.
معلوماتلرگه کۉره، تخمیناً۷۰ فایز افغانستان باشپناه ایزلاوچیلر یکوني مأموري قرارلر اساسیده دېپورت قیلینگن بۉلسه-ده، اَیریملری ایش محاکمهسیگه یېتیب بارمسدن یاکه حلی کۉریب چیقیلهیاتگن پیتده دېپورت قیلینگن.
تحلیل شونی کۉرسهتهدیکی، جنایي اۉتمیش دېیرلی هېچ قندهی رۉل اۉینهمهگن.۹۷ فایز افغان باشپناه ایزلاوچیلر «مهاجرت قانونلرینی بوزگنلر» صفتیده، جنایي حکم یاکه عیبلاولرسیز تصنیفلنگن.
فقط جوده کم سانلی شخصلر جنایتده عیبلنگن یاکه محکمه اېتیلگن بۉلیب، دېیرلی برچه حاللرده اولر خوفسیزلیککه تهدید صفتیده کۉریلمهگن.
معلوماتلرگه کۉره، افغانستانگه قَیتریلگن۱۰۴ کیشیدن۸۷ نفری «باشقه مهاجر قاعدهبوزرلری» طایفهسیگه کیرگن، یعنی اولر جنایي حکمگه اېگه بۉلمهگن.
فقط۱۴ نفر شخص محکمه قیلینگن،۳ نفرگه نسبتاً اېسه ایشلر حلی کۉریب چیقیلهیاتگن بۉلگن.
مذکور معلوماتلرگه کۉره، افغانستانگه دېپورت قیلینگنلرنینگ اکثریتی یعنی۹۲ نفری یکوني دېپورت قرارینی آلگن، بو اېسه اولر نینگ ایشلریده مهاجرت تیزیمینینگ باسقیچلری اۉتیلگنینی کۉرسهتهدی. شونگه قرهمهی،۱۲ نفر شخص یکوني قرارسیز دېپورت قیلینگن بۉلیب، بو محکمه جریانیدهگی احتمالي بۉشلیقلر حقیده خواطر اویغاتهدی.
تحلیل شونی کۉرسهتهدیکی، افغانستانگه دېپورت عمومي جریاننینگ بیر قِسمی بۉلیب، کۉپلب افغان باشپناه ایزلاوچیلر اوچینچی دولتلرگه، خصوصاً کناداگه یوباریلگن.
مذکور معلوماتلرگه کۉره، دېپورتلر نینگ۸۰ فایزدن آرتیغی کناداگه عملگه آشیریلگن بۉلیب، اولر کۉپینچه تۉغریدن-تۉغری پروازلر آرقهلی اېمس، بلکه قوروقلیک چېگرهسی آرقهلی اۉتکزیلگن. بو اېسه اولر نینگ حمایهسی کفالتلنگنینی انگلهتمهیدی.
کنادادهگی دېپورت آمارلریگه کۉره، ۲۰۲۳-ییلده۳۹۳ نفر افغانستان فقراسی اوشبو مملکتدن چیقریب یوباریلگن. بو اېسه امریکادن کنادهگه اۉتکزیلگن اَیریم شخصلر کېینچهلیک ینه دېپورت قیلینیشی، حتا افغانستانگه قَیتریلیشی ممکنلیگینی کۉرسهتهدی.
افغان باشپناه ایزلاوچیلرنینگ افغانستانگه دېپورت قیلینیشی، طالبان تامانیدن احتمالي قصاص آلیش خواطرلری موجود بۉلگن بیر پیتده صادر بۉلماقده.
طالبان حاکمیتگه قَیتگنیدن بېری سابق حکومت حربيلری و عملدارلریگه نسبتاً محکمهسیز قتل، اۉزباشیمچهلیک بیلن حبسگه آلیش و قییناقلر کبی حالتلرده کېنگ مقیاسده عیبلنیب کېلماقده. شونینگدېک، اولر امریکا و ناتو کوچلری بیلن همکارلیک قیلگنلیکده گمان قیلینگن شخصلرنی هم حبسگه آلیب، قییناققه سالگن.
