طالبلر مدافعه وزیری محمد یعقوب مجاهد و چیننینگ کابلدهگی اېلچیسی جاو شینگ اوچرهشیب، ایکّی تامانلهمه علاقهلر، خوفسیزلیک همکارلیگی و منطقهدهگی سۉنگگی اۉزگریشلر حقیده صحبتلشگن.
طالبان مدافعه وزیرلیگینینگ نشر قیلگن بیاناتده یازیلیشیچه، چین اېلچیسی طالبان و پاکستان اۉرتهسیدهگی اورومچی مذاکرهلری حقیده گپیریب، بو جریان دوام اېتیشیگه امید بیلدیرگن.
مذکور وزیرلیک بیاناتیگه کۉره، چین اېلچیسی کېلهجکدهگی طالبان و پاکستان اۉرتهسیدهگی مذاکرهلرگه مېزبانلیک قیلیشگه تیار اېکنینی بیلدیرگن.
طالبان مدافعه وزیری اېسه «ملاقات» معمالرنی حل قیلیشنینگ اېنگ یخشی یۉلی اېکنینی ایتیب، اولرنینگ موضعی «صبر-طاقت، اۉزارا حرمت و توشونیش»گه اساسلنگنینی تأکیدلهگن. شو بیلن بیرگه، مملکتنی «هر قندهی تجاوزگه قرشی حمایه قیلیش»نی اۉزلری نینگ قانوني حقوقی و ملي مسوولیتی دېب بیلیشینی ایتگن.
طالبان مدافعه وزیرلیگینینگ یازیشیچه، اوچرهشوو یکونیده تامانلر «اۉز ارا توشونیش، منطقوي همکارلیکنی کوچهیتیریش و ایشانچنی مستحکملش مهملیگی»نی تأکیدلهگن.
چین اۉتگن هفته طالبان و پاکستان اۉرتهسیدهگی ترنگلیکنی کمهیتیریش و اوروشنی تۉختهتیش مقصدیده مذاکرهلرگه مېزبانلیک قیلگن.
اورومچیده اۉتکزیلگن اوشبو مذاکرهلر بیر هفته دوام اېتیب، تامانلر کېسکینلیکنی کوچهیتیرووچی حرکتلردن تيیلیشگه کېلیشیب آلگن.
شونگه قرهمهی، مذاکرهلر دوامیده و اوندن کېین هم چېگره حدودلریده بیر نېچه بار تۉقنهشوولر کوزهتیلگن.
طالبان و پاکستان اۉرتهسیدهگی اوروش بیر یریم آیدن آرتیق دوام اېتماقده و تامانلر هنوز اوروشنی تۉختهتیش بۉییچه کېلیشووگه اېریشه آلمهگن.
