افغانستاننینگ سابق جمهور رییسی حامد کرزی، بیرلشگن ملتلر تشکیلاتینینگ باش کاتبی آنتونیو گوترش یۉلهگن مکتوبی آرقهلی بیرلشگن ملتلر تشکیلاتی تامانیدن پاکستاننینگ افغانستانگه قیلگن هجوملرینی قارهلشنی سۉرهگنینی اَیتماقده.
اونینگ ایتیشیچه، اوشبو هجوملر انساني تلفاتلر و ملي تاسیساتلرگه کتّه ضرر یېتکزگن همده خلق ارا قانونلر و بیرلشگن ملتلر تشکیلاتی تمایللریگه ضد حسابلنهدی.
کرزی شونینگدېک، پاکستان نینگ سۉنگگی 40 ییلدن آرتیق دورده منطقهده تأثیر اۉتکزیش اوچون اېکسترېمیزم و قوراللی تۉقنهشوولردن واسطه صفتیده فایدهلنگنینی تأکیدلهگن.
او بیرلشگن ملتلر تشکیلاتی باش کاتبیدن وضعیتگه ارهلشیب، هجوملر و افغانستاننینگ حاکمیتی یخلیتلیگیگه تجاوزلرنینگ آلدینی آلیشنی همده منطقهده کېسکینلیکنی کمهیتیریشنی سۉرهگن.
افغانستان و پاکستان اۉرتهسیدهگی کېسکینلیک قریب بیر یریم آیدن بېری دوام اېتماقده. شو دور ایچیده پاکستان افغانستاننینگ تورلی حدودلریگه هوا و راکت ضربهلری بېرگن.
سۉنگگی هجوملردن بیریده کابلدهگی گیاهوندلیکدن دوالش مرکزی نشانگه آلینگن. طالبلر معلوماتیگه کۉره، بو هجومده 400 کیشی هلاک بۉلگن و 250 کیشی جراحت آلگن، بیراق بیرلشگن ملتلر تشکیلاتی نمایندهسی 143 کیشی هلاک بۉلگنینی بیلدیرگن.
شونینگدېک، سۉنگگی کونلرده ایکّی تامان وکیللری کېسکینلیکنی کمهیتیریش و تۉقنهشوولرنی تۉختهتیش مقصدیده اورومچیده مذاکرهلر اۉتکزگن، بیراق حاضرچه نتیجهلر انیق اېمس و چېگرهوي حدودلرده تۉقنهشوولر دوام اېتماقده.
