آسترلیا یېتکرمهلرینینگ خبر بېریشیچه، رابرتس اسمیت مملکتنینگ اېنگ کۉپ مکافات آلگن تیریک عسکری، افغانستانده صادر اېتیلگن اوروش جنایتلریده گمان قیلینیب حبسگه آلینگن.
اسبیاسنیوزنینگ معلوماتیگه کۉره، او بوگون (سهشنبه، ۱۸حمل) سیدنی قۉنالغهسیده قۉلگه آلینگن و کون آخریده «نیو ساوت ولز»ایالتیدهگی محکمهده اشتراک اېتیشی کوتیلماقده.
خبرده ایتیلیشیچه، او۲۰۰۹-۲۰۱۲ ییللر آرهلیغیده افغانستاننینگ ارزگان ولایتیده صادر اېتیلگن بېشته ناقانوني قاتللیکده عیبلنماقده.
اسبیاسنیوز نینگ یازیشیچه، آسترلیا فدرال پولیسی و مخصوص تېرگاو ادارهسی (اواسآی) اونینگ۲۰۰۹-ییل ۱۲-اپریل کونی ارزگان نینگ «کاکرک» حدودیده بیر کیشینینگ اۉلیمیگه قصداً سبب بۉلگنینی، شونینگدېک، ینه بیر شخصنی عینِ جای و سنهده شو ایشنی عملگه آشیریشگه اوندهگن یاکه یاردم بېرگنینی دعوا قیلماقده.
شونینگدېک، او ۲۰۱۲ییل ۱۱-سپتمبر کونی «دروان» حدودیده ینه بیر قاتللیککه یاردم بېرگنلیکده هم عیبلنماقده.
کېینگی عیبلاولر اېسه ۲۰۱۲-ییل ۲۰-اکتوبر کونی « سیاهچاو حدودیده صادر بۉلگن واقعهلرگه تېگیشلی بۉلیب، اونده او باشقه بیر شخص بیلن همکارلیکده قصداً آدم اۉلدیریشده عیبلنماقده، همده ینه بیر کیشینی شو ایشگه اوندهگن یاکه یاردم بېرگنلیکده گمان قیلینماقده.
اسبیاسنیوزنینگ یازیشیچه، اوشبو جنایتلرنینگ هر بیری آسترلیا قانونچیلیگیگه کۉره عمرباد قماق جزاسی بیلن جزالنیشی ممکن.
رابرتس اسمیت اوّلراق افغانستانده آسترلیالیک عسکرلر تامانیدن صادر اېتیلگن اوروش جنایتلرینی فاش قیلگن اوچ ژورنالیست اوستیدن «تهمت» دعواسی بیلن محکمهگه مراجعت قیلگن و اۉزیگه قۉییلگن عیبلاولرنی رد اېتگن اېدی.
بیراق آسترلیا فدرال محکمهسی اوزاق دوام اېتگن فقرالیک ایشی یکونیده اونگه قرشی قرار چیقرگن و اونی افغانستاندهگی خدمت دوریده کمیده تۉرتته ناقانوني قاتللیک اوچون مسوول دېب تاپگن.
