هلمند و قندههار ولایتلریده محلي طالبان رسمیلری کوچلی یامغیر و سېل عاقبتیده ۵۵۰ ته یشش اوی ضرر کۉرگنینی معلوم قیلیشدی.
هلمند ولایتیدهگی «طالبان» محلي مسووللرینینگ ایتیشیچه، کېچهگی (چهارشنبه،۱۲-حمل) یاغگن یامغیر نتیجهسیده بو ولایتده ۳۰۰ ته اوی تۉلیق ویران بۉلگن.
«طالبان» نینگ هلمندهگی امنیه قوماندانلیگی مطبوعات سۉزلاوچیسی بو ضررلر اساسا گرمسیر، سنگین و نهر سراج اولسواللیکلریده یوز بېرگن دېگن.
اولرنینگ ایتیشیچه، سنگین و نهر سراج اولسواللیکلریده اویلرنینگ تاملری قولهب توشگن، کوچلی شمال اېسه سولرلرنی سیندیرگن.
رسميلر انساني تلفاتلر حقیده هېچ قندهی معلومات بېرمهگن.
قندههار ولایتیدهگی طبيعي آفتلرگه تیارگرلیک ادارهسی هم کوچلی یامغیر و سېل عاقبتیده ولایت مرکزی و بیر قطار تومنلردهگی اۉنلب عایلهلر ضرر کۉرگنینی معلوم قیلگن.
محلي «طالبان» معلوماتلریگه کۉره، قندهار شهرینینگ تورلی حدودلریده۲۵۰ ته اوی قسماً یاکه تۉلیق ویران بۉلگن،۲۰۰ ته عایله اېسه کۉچیریلگن.
شونینگدېک، ارغنداب اولسواللیگیده۱۵ ته، دامان اولسواللیگیده۱۵۰ ته و ژری اولسواللیگیده۱۷۰ ته عایله ضرر کۉرگن.
قندهار ولایتی طبيعي آفتلرگه قرشی کورهش ادارهسی انساني تلفاتلر حقیده هېچ قندهی معلومات بېرمهگن.
سۉنگگی یامغیر و سېل حادثهلری مملکت بۉیلب کتّه انساني و مادّي ضرر کېلتیردی. افغانستان طبيعي آفتلرگه قرشی کورهش ملي ادارهسی کېچه معلوم قیلیشیچه، مملکت بۉییچه قربانلر سانی۴۸ کیشیگه یېتگن.
بوگون هم مملکت نینگ تورلی ولایتلریده یامغیرلر دوام اېتماقده.
