پاکستان یېتکرمهلرینینگ خبر بېریشیچه، افغانستاندهگی طالبان و پاکستان اۉرتهسیدهگی کېسکینلیکنی کمهیتیریش مقصدیده سیاسي یېتکچیلر و قبیله آقسقاللری اشتراکیده قۉشمه تینچلیک جرگهسی خیبرپختونخوا ایالتینینگ پېشاور شهریده اۉتکزیلیشی رېجهلشتیریلگن.
جیونیوزنینگ خبریگه کۉره، اوشبو جرگه سهشنبه کونی (۱۱حمل) پېشاورده بۉلیب اۉتهدی.
اوشبو رسانه سابق خیبرپختونخوا ایالتی کاتبی شهزاد خانگه تهیهنیب یازیشیچه، جرگهده «تنیقلی سیاسي یېتکچیلر، قبیله آقسقاللری، دیني علمالر، مدنی جمعیت وکیللری، تجارت همجمعیت و یېتکرمه نمایندهلری» اشتراک اېتهدی.
مذکور سیاسي رسمینینگ ایتیشیچه: «تینچلیک جرگهسی اۉزارا حرمت، ایشانچنی مستحکملش و برقرار تینچلیک اوچون جدّي مذاکرهلرگه قرهتیلهدی.»
اونینگ قۉشیمچه قیلیشیچه، جرگه یکونیده تینچلیکنی قۉللب-قوّتلاوچی قۉشمه بیانات قبول قیلینیب، ایکّی دولت حکومتلریگه یوباریلهدی.
شهزاد خاننینگ ایتیشیچه، جرگه اشتراکچیلری پاکستان و طالبان یېتکچیلریدن زودلیک بیلن اۉت آچیشنی تۉختهتیشنی عملگه آشیریشنی، کېسکینلیکنی کمهیتیریشنی و برچه مسألهلرنی ملاقات همده دیپلوماتیک یۉللر آرقهلی حل قیلیشنی سۉرهشهدی.
طالبان و پاکستان اۉرتهسیدهگی تۉقنهشوولر بیر آیدن آرتیق دوام اېتماقده. شو وقت ایچیده پاکستان افغانستان نینگ تورلی حدودلریگه هوا و راکت هجوملری اویوشتیرگن.
سۉنگگی حالتده پاکستان کابلدهگی گیاهوندلیکدن دوالش مرکزیگه هجوم قیلگن بۉلیب، انسان حقوقلری تشکیلاتلری معلوماتیگه کۉره، اونده۱۴۰ دن آرتیق کیشی هلاک بۉلگن و ینه۲۵۰کیشی یرهلنگن.
طالبان هم پاکستان چېگره پُستهلریگه هجوم قیلگن همده اوشبو مملکت حدودیدهگی اَیریم نشانلرگه درون ضربهلری بېرگن.
ایکّی تامان فقط رمضان هییتی کونلریده سعوديه عربستانی، قطر و تورکيه سۉراوی بیلن وقتینچهلیک اۉت آچیشنی تۉختهتیشگه راضی بۉلگن، بیراق شوندن کېین هم اَیریم تۉقنهشوولر قید اېتیلگن.
طالبان کېسکینلیکنی دیپلوماتیک یۉل بیلن حل قیلیش طرفداری اېکنینی بیلدیرگن، اما پاکستان رسميلری اۉز مقصدلریگه اېریشمهگونچه هجوملرنی دوام اېتتیریشینی ایتگن.
