انسان حقلرینی کوزهتووچی تشکیلات پاکستاننینگ کابلده «امید» مخدرمادهلرگه بېریلگنلرنی دوالش مرکزیگه هجومینی «ناقانوني» دېب بهالب، بو هجوم احتمال «حربي جنایت» اېکنینی بیلدیردی.
مذکور تشکیلات بوگون (جمعه، ۷ حمل) نشر قیلگن بیاناتیده خلق ارا تشکیلاتلرگه تهیهنیب یازیشیچه، هجوم نتیجهسیده کمیده ۱۴۳ کیشی هلاک بۉلگن و۲۵۰ کیشی جراحتلنگن.
تشکیلات نینگ آسیا بۉلیمی اۉرینباسری پاتریشیا گاسمننینگ ایتیشیچه «موجود دلیللر شونی کۉرسهتهدیکی، پاکستان نینگ کابلدهگی تنیقلی دوالش مرکزیگه اویوشتیرگن هوا هجومی، اۉنلب بېمارلرنینگ اۉلیمیگه سبب بۉلگن و ناقانوني بۉلگن.»
اونینگ قۉشیمچه قیلیشیچه «پاکستان رسميلری مستقل و خالص تېرگاو اۉتکزیب، نېگه تینچ اهالیگه تۉله طبي مرکز نشانگه آلینگنینی و کیملر جوابگر اېکنینی انیقلشی کېرهک.»
انسان حقلرینی کوزهووچی تشکیلات پاکستاننینگ «حربي تاسیسات و اۉق-داری انبارلری نشانگه آلینگن» دېگن دعواسیگه جوابن، «امید» مرکزیدن حربي مقصدلرده فایدهلنیلگنیگه عاید هېچ قندهی دلیل تاپیلمهگنینی معلوم قیلگن.
مرکز خادملریدن بیری نینگ ایتیشیچه، هجومده اوچته بنا نشانگه آلینگن: کتّه طعاملنیش سالون، 450 بېمار جایلشگن بنا و سکّیز کیشی ایشلهگن قۉریقچیلر خانهسی.
صنعي یۉلداش تصویرلری تحلیلیگه کۉره، اېنگ کتّه بنا و ینه ایکّی کیچیک بنا بوتونلهی ویران بۉلگن، اطرافدهگی بنالر اېسه جدّي ضرر کۉرگن و مجموعهنینگ بیر قِسمی یانیب کېتگن.
تشکیلات، شونینگدېک، پاکستان اخبارات وزیری تامانیدن ۱۷ مارچ کونی اعلان قیلینگن ویدیونی هم تصدیقلهگن. ویدیوده راکت نینگ اساسي بناگه اوریلیشی و کېین باشقه بنالرده پارتلشلر یوز بېرهیاتگنی کۉرسهتیلگن.
انسانپرورلیک تشکیلاتلر معلوماتیگه کۉره، کتّه بنا طعاملنیش و یشش جایی بۉلگن، باشقه بنالر اېسه تورر جای و قۉریقلش خانهسی صفتیده ایشلهتیلگن.
انسان حقلرینی کوزهتووچی تشکیلات ینه اوچته ویدیونی هم تصدیقلهگن بۉلیب، اولرده هجومدن کېینگی قیدیروو ایشلری و کېنگ کۉلملی یانغین عکس اېتگن.
معلوماتلرگه کۉره، مجموعه ترکیبیده طالبان ساغلیقنی سقلش وزیرلیگی باشقروویدهگی «ابن سینا» ۱۰۰۰ اۉرینلی گیاهوندلیکنی دوالش شفاخانهسی هم جایلشگن.
تشکیلاتنینگ قید اېتیشیچه، باشقه بنالرنینگ انیق وظیفهسی نامعلوم، بیراق ویدیولرده اۉق-داری یاکه پارتلاوچی مادّهلر بیلن باغلیق ایکّیلمچی پارتلشلر کۉرینمهگن.
گواهلرگه کۉره، هجوم وقتیده مرکزده مینگدن آرتیق کیشی بۉلگن، اولرنینگ انیق سانی نامعلوم. اَیریم بېمارلر رمضان افطاری اوچون طعاملنیش سالونیده ییغیلگن بۉلگن.
بیرلشگن ملتلر تشکیلاتی هم اوشبو هجوم نتیجهسیده گیاهوندلیکدن دوالنهیاتگن اۉسمیرلر جایلشگن بۉلیم تۉلیق ویران قیلینگنینی بیلدیرگن.
انسان حقلرینی کوزهتووچی تشکیلاتنینگ تأکیدلشیچه، خلقارا انسانپرورلیک حقوق برچه تامانلرنی تینچ اهالینی حمایه قیلیشگه مجبور قیلهدی. شفاخانهلر و طبي مرکزلر علیحده حمایهگه اېگه بۉلیب، فقط حربي مقصدلرده فایدهلنیلگن تقدیردهگینه قانوني نشانگه ایلنیشی ممکن.
