«افغانستان اوچون عیاللر» ناملی تشکیلات لندنده «بیرلیک و ایشانچ سری» دېب ناملنگن ایکّی کونلیک ییغیلیش اۉتکزهیاتگنینی معلوم قیلدی.
اوشبو تشکیلات بیاناتیگه کۉره، ییغیلیش تیناوون باشلنگن و بوگون (چهارشنبه، ۵حمل) هم دوام اېتهدی.
«افغانستان اوچون عیاللر» تشکیلاتینینگ ایتیشیچه، ییغیلیشده تخمیناً۴۰کیشی، جملهدن «سیاسي حزبلر، مذاکره جریانلری، مدنی جماعهچیلیک تشکیلاتلری، مدیا و نماینده لری قۉشیمچه تنیقلی سیاسي و مدنی فعاللری» اشتراک اېتگن.
تشکیلاتنینگ قۉشیمچه قیلیشیچه، اوشبو ییغیلیش «افغانستاندهگی حاضرگی بحراننی حل قیلیش یۉلیده عمومي تمایللر و قدریتلرنی مستحکملش بۉییچه دایمي سعی-حرکتلرنینگ بیر قِسمی» حسابلنهدی.
اولرنینگ سۉزلریگه کۉره،اوچرهشووده «افغانستان کېلهجگی بۉییچه عمومي قرهشلرنی شکللنتیریشگه قرهتیلگن کانتروکتیف محاکمهلر» آلیب باریلماقده، جملهدن «اشتراکچیلرگه خلق آرزو قیلگن و مناسب بۉلگن کېلهجکنی تصور قیلیشگه یاردم بېرهدیگن اساسي اوستوار یۉنهلیشلر» بحث قیلینماقده.
«افغانستان اوچون عیاللر» تشکیلاتینینگ بیلدیریشیچه، بیرینچی کون «تورلی سیاسي و مدنی گروهلری اۉرتهسیده اۉزارا توشونیشنی آشیریش و ایشانچ محیطینی یرهتیش»گه بغیشلنگن بۉلیب، اوّلگی باسقیچده انیقلنگن عمومي تمایللرگه اساسلنگن.
تشکیلاتگه کۉره، ایکّینچی کون اېسه بریتانيادهگی خلقارا همکارلر، جملهدن دیپلوماتلر، اېلچیلر، بریتانيا سنا همده نمایندهلر مجلسی اعضالری و افغانستان مسألهسی بیلن شغللنووچی مدنی جمعیتی تشکیلاتلری و تحلیل مرکزلری بیلن اوچرهشوولرنی اۉز ایچیگه آلهدی.
اولرنینگ مقصدی افغانستان بۉییچه اساسي اوستوار یۉنهلیشلر حقیده عمومي توشونچه یرهتیش و خلقارا همکارلر بیلن ملاقاتنی کوچهیتیریش.
تشکیلات بو مذاکرهلر «ایشانچنی مستحکملش، همکارلیکنی کوچهیتیریش و کېلهجکده تینچ، برقرار و عدالتلی افغانستاننی شکللنتیریشگه یاردم بېریشیگه امید بیلدیردی؛ بونده عیاللر مرکزي و مهم رۉل اۉینشی کېرهک»، دېب تأکیدلهدی.
«بیرلیک و ایشانچ سری» ناملی بیرینچی اوچرهشوو اۉتگن ییلی پاکستاننینگ اسلام آباد شهریده اۉتکزیلگن اېدی.
اسلام آباددهگی اوشبو ییغیلیش تنقیدلرگه هم سبب بۉلگن و جملهدن امریکانینگ افغانستان بۉییچه سابق مخصوص وکیلی زلمی خللیلزاد بو ییغیلیش پاکستان استخباراتینینگ طلبی بیلن اۉتکزیلگنینی ایتگن اېدی.
