پاکستان تشقی ایشلر وزیری اسحاقدارنینگ ایتیشیچه، پاکستاننینگ افغانستان ایچکریسیدهگی هجوملری «تروریزم تهدیدینی یۉق قیلیش» مقصدیده عملگه آشیریلماقده.
او بوگون (دوشنبه، ۳ حوت) «پاکستان کونی» مناسبتی بیلن نشر قیلگن پیامیده شوندهی دېگن: «پاکستان تروریزم تهدیدینی یۉق قیلیشگه قطعي صادق قالهدی. افغانستان ایچکریسیده «فتنهالهندوستان» و «فتنهالخوارج/تیتیپی» تهدیدلریگه قرشی آلیب باریلهیاتگن حرکتلر عیناً شو مقصدگه قرهتیلگن.»
پاکستان حکومتی «فتنهالهندوستان» اتَمهسینی «بلوچستان آزادلیک حرکتی دېب اتهلووچی عصیانچیلرگه، «فتنهالخوارج/تیتیپی» اتَمهسینی اېسه تحریک طالبان پاکستان (تیتیپی) اوچون ایشلهتهدی و بو گروهلر هندستان تامانیدن قۉللب-قوّتلنهیاتگنینی دعوا قیلهدی.
طالبلر و پاکستان اوچ هفتهلیک تۉقنهشوولردن سۉنگ اۉتگن هفته چهارشنبه یریم توندن باشلب، سعودیه عربستانی، قطر و تورکیه واسطهچیلیگیده رمضان هییتی مناسبتی بیلن وقتینچهلیک صلح اعلان قیلگن اېدی.
پاکستان اخبارات وزیری اۉشه پیتده اعلان قیلگن بیاناتگه کۉره، بو صلح بوگون یریم تونده یکونیگه یېتهدی.
سۉنگگی اوچ هفته دوامیده پاکستان افغانستاننینگ تورلی حدودلرینی، جملهدن کابلنی هم بیر نېچه بار نشانگه آلگن. سۉنگگی حالتده اۉتگن هفته دوشنبه کونی کابلدهگی «امید» ناملی مخدرماده گه بېریلگنلرنی دوالش مرکزی هوا هجومیگه اوچرهگن، طالبان بو هجوم اوچون پاکستاننی مسوول دېب بیلگن.
طالبان معلوماتلریگه کۉره، اوشبو هجومده ۴۰۰کیشی هلاک بۉلگن و ۲۵۰ کیشی جراحتلنگن، بیراق مستقل منبعلر حاضرچه بو رقملرنی تصدیقلهمهگن.
تۉقنهشوولر باشلنگنیدن بېری تورلی دولتلر زودلیک بیلن زۉرآورلیکنی تۉختهتیش و معمالرنی مذاکرهلر آرقهلی حل قیلیشگه چقیرگن، بیراق پاکستان افغانستاندن کېلهیاتگن تروریزم تهدیدی توگهمهگونچه هجوملر دوام اېتیشینی تأکیدلهماقده.
