هند تشقی ایشلر وزیرلیگی کابلدهگی گیاهوندلیکنی دوالش مرکزیگه قیلینگن هجومده یرهلنگنلرنی دوالش و تېزراق ساغهییشیگه کۉمکلشیش مقصدیده۲.۵ تُن شاشیلینچ دارو-درمان، بیر مرتهلیک طبي واسطهلر، طبي کیتلر و جهازلرنی کابلگه یوباریشینی معلوم قیلدی.
هند تشقی ایشلر وزیرلیگی مطبوعات کاتبی راندهیر جیسوال بوگون (جمعه،۲۹ حوت) ایکس اجتماعي ترماغیده نشر قیلگن پُستیده اوشبو یاردم یوکینینگ یوباریلیشینی تصدیقلهدی.
اونینگ قۉشیمچه قیلیشیچه، هند افغانستان خلقی بیلن بیردم اېکنینی بیلدیرهدی و بو آغیر دورده برچه ممکن بۉلگن انسانپرورلیک یاردمینی کۉرسهتیشده دوام اېتهدی.
کابلدهگی «امید» ناملی گیاهوندلیکنی دوالش مرکزی هفتهنینگ دوشنبه کونی کېچقورون هوا هجومیگه اوچرهگن اېدی.
طالبلر بو هجوم اوچون پاکستاننی مسوول دېب بیلیب، اونده۴۰۰ کیشی هلاک بۉلگنی و ینه۲۵۰ کیشی یرهلنگنی حقیده معلوم قیلگن.
بیراق بیرلشگن ملتلر تشکلاتینینگ افغانستاندهگی ماموریتی بنلد مرتبهلی رسمیسینینگ رویترزگه بېرگن صحبتیده قربانلر سانی ۱۴۳ کیشی اېکنینی ایتگن.
پاکستان اېسه بو هجوم اوچون جوابگرلیکنی رد اېتیب، «حربي هدف و ترورچیلرنی قۉللب-قوّتلاوچی تاسیساتلر» نشانگه آلینگنینی بیلدیرگن.
