بیرلشگن ملتلر تشکلاتینینگ افغانستاندهگی نمایندهلیگی یوناما، کېچه پاکستان تامانیدن کابلده مخدرمادهلرگه بېریلگنلرنی دوالش مرکزیگه اویوشتیریلگن هجومده «اۉنلب انسان اۉلدیریلگن یا یرهلنتیریلگن دېب معلوم قیلدی.»
یوناما بوگون (سهشنبه،۲۶ حوت) کېچقورون بېرگن بیاناتیده قربانلر عایلهلریگه همدردلیک بیلدیریب، افغانستاندهگی تینچ اهالی طالبان و پاکستان اۉرتهسیدهگی دوام اېتهیاتگن ماجرا اوچون قیمت تۉلهیاتگنینی تأکیدلهدی.
یونامانینگ معلوماتیگه کۉره،۲۶ فبروریدن۱۶ مارچگچه بۉلگن دورده اوشبو ماجرا نتیجهسیده کمیده ۷۶ نفر تینچ اهالی هلاک بۉلگن و ینه۲۱۳ کیشی جراحتلنگن.
تشکیلات کېچهگی هجومگه اشاره قیلیب «خلقارا قانونلرگه کۉره، ماجراده اشتراک اېتهیاتگن برچه تامانلر بېمارلر و یرهلنگنلر، طبیات خادملری، شفاخانهلر و تېز یاردم موترلرینی حرمت قیلیشی و اولرنی حمایه قیلیشی شرط دیگن.»
خلقارا قانونلر «شفاخانهلر و نا حربی مکانلرنی هر قندهی هجومنی قطعیا تعقیقلهیدی دېب قۉشیمچه قیلگن یوناما.»
تشکیلات ینه بیر بار «کېسکینلیکنی کمهیتیریش و تېزلیک بیلن اۉت آچیشنی تۉختهتیش»گه چقیریب، تامانلردن «خلقارا قانونلر آلدیدهگی مجبوريتلریگه عمل قیلیب، تینچ اهالینی حمایه قیلیش»نی طلب قیلدی.
کېچه پاکستان کابلدهگی ایکّی مینگ اۉرینلی مخدر مادهگه بېریلگنلرنی دوالش شفاخانهسینی بامباردمان قیلگن. طالبان معلوماتیگه کۉره، اوشبو هجومده کمیده۴۰۰کیشی جان بېرگن و ینه۲۵۰کیشی یرهلنگن.
