امریکا قۉشمه ایالتلرینینگ مهاجرت ادارهسی، محمد نذیر پکتياوال اسملی افغانستانلیک شخص حبسگه آلینگنیدن۲۴ ساعت اۉتیب شفاخانهده وفات اېتگنینی تصدیقلهدی.
ادارهنینگ اعلان قیلگن بیاناتیگه کۉره، او۱۴ مارچ کونی «پارکلند» دالاس تگزاس شفاخانهسیده وفات اېتگن.
مذکور ادارهنینگ معلوماتیگه کۉره،۱۳ مارچ کونی او مقصدلی عملیات دوامیده حبسگه آلینگن و اونگه نسبتاً مهاجرتی پرونده ایشی آچیلگن.
اۉشه کونی کېچقورون سقلش خانهسیده بۉلگن پیتده او نفس قیسیشی و کۉکرهک آغریغیدن شکایت قیلگن. شوندن سۉنگ او پارکلند شفاخانهسیگه آلیب باریلگن و نفس آلیش بیلن باغلیق دوالنیش باشلنگن.
ادارهنینگ ایتیشیچه،۱۴ مارچ اېرتهلب او نانوشته قیلهیاتگن پیتده طبیات خادملری اونینگ تیلی شیشیب کېتگنینی پَیقهشگن و زودلیک بیلن طبي چارهلر کۉریلگن.
بیر نېچه بار جانینی سقلب قالیش اوچون اورینیشلر قیلینگن، بیراق ساعت۹:۱۰ده اونینگ وفاتی اعلان قیلینگن.
ادارهنینگ بیلدیریشیچه، بو اۉلیم حالتی حاضرده تېکشیروو آستیده.
بو واقعه یوزهسیدن افغان ایواک تشکیلاتی چوقور تأسف بیلدیرگن و شفّاف تېکشیروو اۉتکزیلیشینی طلب قیلگن. تشکیلات معلوماتیگه کۉره، محمد نذیر پکتياوال آلتی فرزندنینگ آتهسی بۉلگن و۲۰۰۵ ییلدن باشلب افغانستانده امریکا قۉشمه ایالتلری حربیلری بیلن پکتیاده بیرگه ایشلهگن.
او و اونینگ عایلهسی افغانستان طالبلر قۉلیگه سقوط قیلگندن سۉنگ (۲۰۲۱)دن کېین،۳۰اگوست۲۰۲۱ ییل کونی امریکاگه کۉچیریب کېلینگن.
عایله اعضالرینینگ ایتیشیچه، او۱۳مارچ کونی اېرتهلب فرزندلرینی مکتبگه آلیب باریش اوچون اویدن چیقهیاتگن پیتده فدرال مامورلری تامانیدن حبسگه آلینگن. افغان ایواک اوشبو ایش بۉییچه زودلیک بیلن و شفّاف تېرگاو اۉتکزیلیشینی سۉره گن.
