افغانستان بۉییچه چیننینگ مخصوص نمایندهسی یو شیائو یونگ ایتیشیچه، طالبان افغانستانده چین وطنداشلرینی ترور هجوملریدن حمایه قیلیش و اولرنینگ خوفسیزلیگینی تأمینلش بۉییچه سعی-حرکتلرنی کوچهیتیرماقده.
او ایکس ترماغیده یازیشیچه، طالبان تشقی ایشلر همده صناعت و تجارت وزیرلری بیلن اوچرهشوولرده اولر بو مسألهده تیارلیکلرینی بیلدیرگن.
چیننینگ مخصوص نمایندهسی سۉنگگی کونلرده کابلگه سفر قیلگن و امیرخان متقی، طالبان تشقی ایشلر وزیری، همده نۉرالدین عزیزی، طالبان صناعت و تجارت وزیری بیلن اوچرهشوو و مذاکرهلر اۉتکزگن.
جاري قویاشي ییل نینگ جدی آیی نینگ آخرلریده، کابلدهگی چینلیکلر رستورانتی پارتلشی نتیجهسیده آلتی افغانستان وطنداشی و بیر مسلمان چین فقراسی هلاک بۉلگن. اوشبو هجومده ینه 13 کیشی یرهلنگن.
داعش گروهی اوشبو هجوم اوچون جوابگرلیکنی اۉز ذمّهسیگه آلگن و ایتیشیچه، انتحاری هجومچی تخمیناً یریم ساعت رستورانتده چین فقرالری نینگ ییغیلیشی کۉپهییشینی کوتگن.
شو وقت نینگ اۉزیده، چین تشقی ایشلر وزیرلیگی اوشبو هجومنی قارهلهگن و طالباندن افغانستاندهگی چینلیکلر و لایحهلرینینگ خوفسیزلیگینی تأمینلشنی سۉرهگن.
