بیرلشگن ملتلر تشکیلاتینینگ باش کاتبی آنتونیو گوترش اۉزینینگ ینگی گزارشیده ۲۰۲۵ییل ۱-نوامبردن۲۰۲۶-ییل ۳۱-جنوریگچه افغانستانده خوفسیزلیک بیلن باغلیق ایکّی مینگ ۶۶۰ته حادثه قید اېتیلگنینی ایتدی.
باش کاتب نینگ ایتیشیچه، بو کۉرستکیچ اۉتگن ییل نینگ شو دوریگه نسبتاً۲۷.۸فایزگه آشگنینی کۉرسهتهدی.
اونینگ قۉشیمچه قیلیشیچه، بو دورده طالبانگه قرشی گروهلر، جملهدن افغانستان آزادلیک جبههسی و افغانستان ملی مقاومت جبههسی طالبانگه قرشی۳۶ ته هجوم اوچون جوابگرلیکنی اۉز ذمّهسیگه آلگن، شوندن۱۴ تهسی بیرلشگن ملتلر تشکیلاتی تامانیدن تصدیقلنگن.
گزارشده ایتیلیشیچه، بو هجوملر بدخشان، بلخ، فاریاب، هرات، کنر، قندوز، کابل، قندهار، لوگر و پنجشیر ولایتلریده صادر بۉلگن. اولر راکت، نارنجک هجوملری همده طالبان پُستهلری و عملدارلری کاروانلریگه قرهته اۉق اوزیش کبی ترقاق هجوملرنی اۉز ایچیگه آلگن.
حساباتده شونینگدېک کابلدهگی بیر چینلیک رستورانتیگه اویوشتیریلگن هجوم هم تیلگه آلینگن بۉلیب، اونینگ جوابگرلیگینی داعش اۉز ذمّهسیگه آلگن. بیراق قربانلر حقیده تفصیلات بېریلمهگن.
بیرلشگن ملتلر تشکیلاتی باش کاتبی ینه ایتیشیچه، بو اوچ آی دوامیده افغانستاننینگ ایران و پاکستان بیلن چېگرهلریده هم بیر نېچه خوفسیزلیک حادثهلری صادر بۉلگن.
۶-نوامبر کونی طالبان و پاکستان کوچلری اۉرتهسیده تۉقنهشوو بۉلیب، قندهار ولایتیدهگی تینچ اهالی یشش حدودلری و زیر ساختلرگه تأثیر قیلگن.
طالبان خوفسیزلیک کوچلری و ایران کوچلری هم نیمروز ولایتی چېگرهسیده تۉقنهشیب، نتیجهده چېگره وقتینچه یاپیلگن.
شونینگدېک۹-۱۱-نوامبر کونلری طالبان و پاکستان کوچلری خوست و پکتیکا ولایتلری چېگرهسی بۉیلب یېنگیل قوراللر بیلن اۉق المشگن. 4 دسمبر کونی پکتیکادن پاکستانگه اۉتماقچی بۉلگن شخصلرگه قرهته اۉق اوزیلگن. 5 دسمبر کونی قندهار ولایتی نینگ ایکّی چېگره نقطهسیده طالبان و پاکستان کوچلری اۉرتهسیده تۉقنهشوو بۉلگن.
گزارشگه کوره۱۷ جنوری کونلری کنر ولایتی چېگرهسی بۉیلب بیر نېچه مرته تۉقنهشوولر قید اېتیلگن.
۱۹-۲۰ جنوری کونلری قندهار ولایتی نینگ معروف تومنی چېگرهسیده هم تۉقنهشوولر یوز بېرگن. ۳۱جنوری کونی پاکستان کوچلری چېگره یقینیده کوزهتوو منارهسی قورهیاتگن پیتده ننگرهار ولایتی نینگ لعلپور تومنیده طالبان بیلن آغیر قوراللر و مینامیاتلر بیلن اۉق المشگن.
حساباتده ینه ایتیلیشیچه: ۲۴دیکابر، شونینگدېک۱۹-۱۸جنوری کونلری تاجیکستان چېگرهچیلری بدخشاندن تاجیکستانگه اۉتماقچی بۉلگن شخصلر بیلن تۉقنهشگن و نتیجهده فقرالر آرهسیده قربانلر بۉلگن.
باش کاتب ینه شونی تأکیدلهگنکی۱نوامبردن ۳۱جنوریگچه افغانستان بۉیلب بیر نېچه هوا هجوملری و درون فعالیتی هم قید اېتیلگن.
محلي اهالی غزنی، قندهار، خوست، میدان وردک، پنجشیر و پکتیکا ولایتلریدهگی اَیریم تومنلر اوستیده درونلر اوچهیاتگنینی کوزهتگن.
گزارشگه کوره،: 4 نوامبر کونی ننگرهاردهگی بیر مسجدگه اویوشتیریلگن درون هجومیده تحریک طالبان پاکستان نینگ یوقاری مرتبهلی قوماندانی اۉلدیریلگن.
۲۵نوامبر کونی خوست، کنر و پکتیکا ولایتلریده، شونینگدېک۳-۱۴دسمبر کونلری غزنی ولایتیده هوا هجوملری دوام اېتگن.
شونینگدېک: ۱۳ دسمبر کونی کنر ولایتیده بیر اوی یقینیده پارتلاوچی مادّه پارتلب، تیتیپیگه علاقهدارلیکده گمان قیلینگن اوچ کیشی هلاک بۉلگن.
۱۳ جنوری کونی ننگرهار ولایتینینگ گوشته تومنیده درون هجومی نتیجهسیده بیر نېچه تینچ اهالی جراحت آلگن.
حساباتیده ینه ایتیلیشیچه، ۲۰۱۵-ییل 1-نوامبردن ۲۰۲۶ییل۳۱جنوریگچه بیرلشگن ملتلر تشکیلاتی خادملریگه بېواسطه تأثیر قیلگن ۴۷ ته خوفسیزلیک حادثهسی قید اېتیلگن. اۉتگن ییل نینگ شو دوریده اېسه۴۲ ته حادثه قید اېتیلگن اېدی.
طالبان حاضرچه بو ینگی حساباتگه مناسبت بیلدیرمهگن. اولر افغانستانده حاکمیتنی قَیته اېگهلهگنیدن بېری مملکتده تۉلیق خوفسیزلیک تأمینلنگنینی دعوا قیلیب کېلهدی. بیراق داعش هجوملری، باشقه قوراللی گروهلر فعالیتی همده پاکستان بیلن تۉقنهشوولر طفیلی تینچ اهالی آرهسیده قربانلر دوام اېتماقده.
