پاکستاننینگ افغانستان بۉییچه مخصوص نمایندهسی محمدصادق بریتانیانینگ بومملکتدهگی عالي کمیساری جین ماریوت بیلن اوچرهشیب، مذاکره قیلگنینی ایتدی.
پاکستاننینگ مخصوص نمایندهسی بوگون (جمعه،۱۵حوت) ایکس اجتماعی ترماغیده یازیشیچه اولر «منطقوي اۉزگریشلر و دوام اېتهیاتگن ترورچیلیک تهدیدلری» حقیده صحبتلشگن.
محمد صادق اوشبو اوچرهشوو تفصیلاتلری حقیده قۉشیمچه معلومات بېرمهگن.
بو اوچرهشوو طالبان و پاکستان اۉرتهسیدهگی ینگی تۉقنهشوولر ایکّینچی هفتهگه کیرگن بیر پیتده بۉلیب اۉتدی.
پاکستان رسميلرینینگ ایتیشیچه، افغانستان توپراغیده ترورچی گروهلرنینگ موجودلیگی، اینیقسه تحریک طالبان پاکستان (تیتیپی)، بو مملکت، منطقه و حتا دنیا خوفسیزلیگیگه تهدید سالماقده.
اولرنینگ تأکیدلشیچه، افغانستاندهگی طالبان بیلن تینچلیک فقط ترورچیلیک تهدیدلری برطرف اېتیلگنده و افغانستان توپراغیدن پاکستانگه قرشی فایدهلنیلمهگنده ممکن بۉلهدی.
اما طالبلر افغانستانده هېچ قندهی ترورچی گروه یۉقلیگینی و اولر هېچ بیر گروهگه افغانستان توپراغیدن باشقه دولتلرگه قرشی فایدهلنیشگه رخصت بېرمسلیکلرینی اَیتماقده.
