طالبلر مدافعه وزیرلیگینینگ سۉزلاوچیسی عنایتالله خوارزمی، بو گروه کوچلری پاکستاننینگ شرقي چېگرهسیدهگی بیر پُستهگه هجوم قیلگنینی و نتیجهده تۉرت پاکستانلیک عسکر هلاک بۉلگنینی ادعا قیلدی.
او بوگون (جمعه،۱۵حوت) ایکس اجتماعی ترماغیده یازیشیچه، هجوم خۉست ولایتینینگ علیشېر تومنیدهگی «دبگی» اولسواللیگیده صادر بۉلگن.
طالبلر مدافعه وزیرلیگی سۉزلاوچیسی ینه گروه کوچلری پاکستان چېگره پُستهلرینی اېگهللب آلگن دېب ادعا قیلگن.
پاکستان حاضرچه بو ادعانی تصدیقلهمهگن.
شو بیلن بیرگه، طالبان تیناوون کېچقورون پاکستان کوچلری بیلن تورلی چېگره حدودلریده تۉقنهشوولر بۉلگنینی معلوم قیلگن.
طالبان مدافعه وزیرلیگینینگ بیلدیریشیچه، گروه کوچلری پکتيا ولایتینینگ دندپتان تومنیده، ننگرهار ولایتینینگ موهمند دره تومنی و لعلپور تومنیده، شونینگدېک قندهار ولایتی نینگ شورابک تومنیده پاکستان چېگرهچیلری بیلن جنگ قیلگن.
طالبان و پاکستان اۉرتهسیدهگی تۉقنهشوولر حاضر ایکّینچی هفتهگه کیرگن. بو جنگلر اۉتگن هفته پنجشنبه کېچهسی طالباننینگ پاکستان چېگره پُستهلریگه جواب هجوملری بیلن باشلنگن.
شو وقت ایچیده پاکستان افغانستاننینگ تورلی حدودلریگه هوا و راکت هجوملری اویوشتیرگن. بو هجوملر عاقبتیده۴۲ دن آرتیق تینچ اهالی هلاک بۉلگن و۱۰۰دن آرتیق کیشی یرهلنگن.
پاکستاننینگ هوا و راکت هجوملری نتیجهسیده، شونینگدېک،۲۰ مینگدن آرتیق عایله افغانستانده اۉز اویلرینی ترک اېتیب، کۉچیشگه مجبور بۉلگن.
