بریتانيا حکومتی افغانستانلیکلر اوچون طلبهلیک و ملَکهلی ایشچی ویزهلرینی، اوشبو ویزهلردن باشپناه سۉرهش مقصدیده «سوءاستعمال» قیلینهیاتگنی سببلی، تۉختهتیشینی اعلان قیلدی.
بریتانيا ایچکی ایشلر وزیرلیگینینگ معلوم قیلیشیچه، بو قرار جاري آیینینگ ۲۶ سنهسیدن کوچگه کیرهدی.
شونینگدېک، بریتانيا کامرون، میانما و سودان وطنداشلری اوچون هم طلبهلیک ویزهلرینی بېریشنی تۉختهتهدی.
وزیرلیکنینگ بیلدیریشیچه، ۲۰۵۲-۲۰۲۱ییللر آرهلیغیده افغانستان، کامرون، میانما و سودان فقرالری تامانیدن بېریلگن باشپناه عریضهلری۴۷۰ فایزدن آرتیق آشگن و بو ملت وکیللری باشپناه سۉرهش احتمالی اېنگ یوقاری گروهلر قطاریگه کیرگن.
بیاناتگه کۉره،۲۰۲۱ ییلدن۲۰۲۵ ییل سپتمبر آخریگچه افغانستانلیکلرنینگ طلبهلیک ویزهلری سانیگه نسبتاً باشپناه عریضهلری۹۵ فایزنی تشکیل اېتگن. شو دورده میانما طلبهلری تامانیدن بېریلگن عریضهلر۱۶برابر آشگن.
کامرون و سودان فقرالرینینگ عریضهلری هم۳۳۰ فایزدن آرتیق کۉپهییب، بریتانيانینگ باشپناه تیزیمی اوچون برقرارلیککه تهدید توغدیرگنی ایتیلگن.
وزیرلیکنینگ قۉشیمچه قیلیشیچه، حاضرده ایشچی ویزهسی بیلن کیریب، کېینچهلیک باشپناه سۉرهیاتگن افغانستانلیکلر سانی اولرگه بېریلگن ویزهلر سانیدن هم آشیب کېتگن.
شو باعث، مثلی کۉریلمهگن چارهلر دایرهسیده، اوشبو تۉرت دولت اوچون حاميلیک اساسیدهگی طلبهلیک ویزهلری همده افغانستان فقرالری اوچون ملَکهلی ایشچی ویزهلری بېریلیشی تۉختهتیلهدی.
وزیرلیک معلوماتیگه کۉره،۲۰۲۱ ییلدن بېری قانوني یۉللر آرقهلی بېریلگن باشپناه عریضهلری اوچ برابردن کۉپراق آشگن و اۉتگن ییلی عریضه بېرگن۱۰۰ مینگ کیشی نینگ۳۹ فایزینی تشکیل اېتگن.
سۉنگگی بېش ییل ایچیده جمعی۱۳۳ مینگ۷۶۰ کیشی بریتانياگه قانوني کیرگنیدن سۉنگ باشپناه سۉرهگن.
وزیرلیکنینگ ایتیشیچه، بو شخصلرنینگ کۉپچیلیگی کېینچهلیک سالیق تۉلاوچیلر حسابیدن جایلشتیریلهدی و مذکور تۉرت دولت فقرالری اۉرتهچه کۉرستکیچدن یوقاری درجهده مالیوي ناچارلیک حقیده مراجعت قیلماقده.
حاضرده باشپناه ایزلاوچیلرنی قۉللب-قوّتلش خرجتلری ییلیگه۴ میلیارد فونت استېرلینگدن آشگن. عینِ پیتده اوشبو تۉرت دولتدن قریب ۱۶ مینگ کیشی دولت مبلغی حسابیدن قۉللب-قوّتلنماقده، جملهدن۶ مینگدن آرتیغی مهمانخانهلرده جایلشتیریلگن.
بریتانيا ایچکی ایشلر وزیری شبانه محمود، اوروش و تعقیبدن قاچهیاتگنلرگه دایما باشپناه بېریلیشینی، بیراق ویزه تیزیمی سوءاستعمال قیلینمسلیگی کېرهکلیگینی تأکیدلهدی.
