طالبلر مدافعه وزیرلیگی پاکستان بیلن بۉلگن تۉقنهشوولرده اوشبو گروهنینگ۲۸ اعضاسی اۉلدیریلگنی و ینه۴۲ یرهلنگنینی تصدیقلهدی
طالبان مدافعه وزیرلیگی سۉزلاوچیسی عنایتالله خوارزمی بو رقملرنی بوگون (سهشنبه،۱۲حوت) کابلده اۉتکزیلگن مطبوعات انجمنیده اعلان قیلدی.
پاکستان اېسه حاضرگچه اۉز هجوملری عاقبتیده۴۳۵ نفر طالبان اعضاسی هلاک بۉلگنینی و۶۳۰نفردن آرتیغی جراحتلنگنینی ادعا قیلگن.
طالبان مدافعه وزیرلیگی سۉزلاوچیسی بوگونگی مطبوعات انجمنیده، شونینگدېک، اوشبو گروه هجوملری نتیجهسیده 150 نفر پاکستانلیک حربي هلاک بۉلگنینی هم ادعا قیلدی.
او ینه طالبان حاضرگچه پاکستان نینگ۳۵ ته چېگره پُستهسینی اېگهللب آلگنی و بېشته اوچووچیسیز اوچیش درون اوریب توشیرگنینی ایتدی.
طالبان و پاکستان اۉرتهسیدهگی اوروش اۉتگن پنجشنبه آقشامیده طالبان نینگ پاکستان چېگره پُستهلریگه جواب ضربهسی بېریشی بیلن باشلنگن و هنوز دوام اېتماقده.
پاکستان بو مدت ایچیده افغانستاندهگی۵۱ دن آرتیق جاینی بامباردمان قیلگن، طالبان نینگ پاکستان چېگره پُستهلریگه هجوملری هم دوام اېتگن.
بیرلشگن ملتلر تشکیلاتینینگ افغانستاندهگی یاردم ادارهسی (یوناما) نینگ بوگون معلوم قیلیشیچه، پاکستاننینگ افغانستانگه هجوملری عاقبتیده حاضرگچه۴۲ نفر تینچ اهالی هلاک بۉلگن،۱۰۴ نفری جراحتلنگن و۱۶ مینگدن آرتیق عایله اۉز اویینی ترک اېتیشگه مجبور بۉلگن.
