افغانستان ساغلیقنی سقلش وزیرلیگینینگ سابق وزیری ثریا دلیل انسان حقوقلری کېنگشی ییغیلیشیده افغانستان ساغلیقنی سقلش تیزیمی عیال خادملرسیز دوام اېته آلمهسلیگینی ایتدی.
او عیاللرگه قۉییلگن چېکلاولر، جملهدن طبي تعلیمنینگ تعقیقلنیشی نهفقط بوگونگی عیاللرگه، بلکه کېلهجک اولادلرگه هم سلبي تأثیر کۉرسهتیشی حقیده آگاهلنتیردی.
دلیلنینگ ایتیشیچه، افغانستانده عیاللر و قیزلر ساغلیقنی سقلش خدمتلریگه کیریشده تاباره چوقورلشیب بارهیاتگن تۉسیقلرگه دوچ کېلماقده.
اونگه کۉره، ساغلیقنی سقلش خادملرینینگ ایشلشیگه قۉییلگن چېکلاولر و اېنگ مهمی، طبي تعلیمنینگ تعقیقلنیشی عیاللر و قیزلرنینگ ساغلیق حقوقیدن فایدهلنیشیگه تۉسقینلیک قیلماقده.
«اگر ساغلیقنی سقلش تیزیمینینگ بالقوه ایشچی کوچی نینگ یرمی اوندن چېتلشتیریلسه، بو تیزیم یشب قاله آلمهیدی. اگر وضعیت شو طرزده دوام اېتسه، عاقبتلری نهفقط بوگونگی عیاللرگه، بلکه کېلهجک اولادلرگه هم تأثیر قیلهدی».
او افغانستاندهگی وضعیت خلقارا میدانلرده دایمي کون ترتیبیده بۉلیشی و افغان عیاللری آوازی کوچهیتیریلیشی ضرورلیگینی تأکیدلهدی.
دلیل هر قندهی خلق ارا ییغیلیش طالبان بیلن بۉلهدیگن برچه ملاقاتلرده افغانستاندهگی انسان حقوقلری بحرانی، اینیقسه جنسی آپارتاید مسألهسینی جدّي طرزده کون ترتیبیگه قۉییشی، شرطلر اېسه انیق و برقرار بۉلیشی کېرهکلیگینی ایتدی.
سابق وزیر اهالیگه یۉنلتیریلگن انسان پرورلیک یاردم کۉرسهتیش، جماعهلرنینگ برقرارلیگینی قۉللب-قوّتلش و فعاللیکنی کوچهیتیریشگه چقیردی. اونینگ ایتیشیچه، بو فقرالیک جمعیتی تشکیلاتلرینی قۉللب-قوّتلش، ساغلیقنی سقلش، تعلیم، باشپناه و آزیق-طعام بیلن تأمینلشنی انگلهتهدی.
ثریا دلیل افغانستانده انسان حقوقلری بوزیلیشیگه نسبتاً مقصدلی چارهلر و جوابگرلیکنی تأمینلش ضرورلیگینی تأکیدلب، چېکلاولر و اکتیولرنی موزلهتیش چارهلریده ظلم انیق حجتلشتیریلگن و چېکلنگن بۉلیشی لازملیگینی ایتدی.
دلیل، شونینگدېک، افغانستان بۉییچه ینگی تشکیل اېتیلگن مستقل تېرگاو میکانیزمی تېز فرصتده ایش باشلشی و تۉلیق مالیهلشتیریلیشی کېرهکلیگینی ایتدی.
او آخریده جنسیتی آپارتاید وقت اۉتیشی بیلن انسانیتگه قرشی جنایت صفتیده تن آلینیشی لازملیگینی تأکیدلهدی.
