بیرلشگن ملتلر تشکیلاتینینگ افغانستان بۉییچه انسان حقوقلری مخصوص گزارشگری رچاردبنت اۉزینینگ سۉنگگی گزارشیده افغانستاندهگی عیاللر و قیزلر حیض سلامتلیگی بۉییچه جدّي معمالرگه دوچ کېلهیاتگنینی ایتگن.
گزارشگه کۉره، قشّاقلیک حیض بیلن باغلیق بهداشتی محصولاتلرگه اېریشیش چېکلنگن و نتیجهده کۉپلب عیاللر همده قیزلر ماس بۉلمهگن ماتریاللردن فایدهلنیشگه مجبور بۉلماقده. بو حالت اینفکسیون یوقتیریش خوفینی آشیرهدی.
بنت گزارشیده بهداشتی تۉپلملرنی تقدیم اېتووچی دستورلر قیسقرگنی و بو اینیقسه کۉچیریلگن همده قَیتیب کېلگن عیاللر و قیزلرگه سلبي تأثیر کۉرستگنی قید اېتیلگن.
اونینگ ایتیشیچه، کۉپلب عیاللر و قیزلر بهداشتنی سقلهی آلمسلیک سببلی اویت و اضطرابنی باشدن کچیرماقده. بو اېسه اجتماعي یکّهلنیش و روحي بېزاوتهلیکنینگ کوچهییشیگه آلیب کېلهدی.
گزارشده تأکیدلنیشیچه، اوّلگی حکومت دوریده سقط جنین فقط جوده مخصوص حالتلرده و آنهنینگ حیاتینی سقلب قالیش اوچون رخصت اېتیلگن اېدی.
بنتنینگ ایتیشیچه، طبیات خادملری سقط جنین حاضر هم جوده چېکلنگن شرایطلرده، کۉپینچه خصوصي مرکزلرده و جوده یوقاری خرجتلر عوضیگه عملگه آشیریلهیاتگنینی بیلدیرگن. بو حالت اَیریم عیاللرنی خوفلی اصوللرگه مراجعت قیلیشگه مجبور قیلماقده.
بیرلشگن ملتلر تشکیلاتینینگ مخصوص گزارشگرینینگ قۉشیمچه قیلیشیچه، طالبان تامانیدن اوّلگی قانونلر نینگ تۉختهتیلیشی، اجتماعي تمغه و عاقبتلردن قۉرقوو عیاللرنینگ ساغلیقنی سقلش خدمتلریگه اۉز وقتیده مراجعت قیلیشیگه تۉسقینلیک قیلماقده و آنهلر آرهسیده اسارتلر همده اۉلیم حالتلری خوفینی آشیرماقده.
