طالبان تشقی ایشلر وزیرلیگینینگ معلوم قیلیشیچه، پاکستاننینگ تیناوون کېچه شرقي افغانستاندهگی پکتیکا و ننگرهار ولایتلریدهگی حدودلرگه قیلگن هوا هجوملریگه جوابن، پاکستان اېلچیسی کابلگه چقیریلگن.
وزیرلیک بوگون (یکشنبه، ۳ حوت) اعلان قیلگن بیاناتیده، اۉزینینگ ناراضیلیک مکتوبینی پاکستان اېلچیسیگه تاپشیرگنینی بیلدیرگن.
طالباننینگ تشقی ایشلر وزیرلیگی پاکستان هجوملرینی قارهلب، بونی افغانستاننینگ حاکمیتی یخلیتلیگینی آچیق-آیدین بوزیش دېب اتهگن.
وزیرلیک شونینگدېک، پاکستان تامانیگه شونی توشونتیرگنکی: «افغانستان توپراغینی حمایه قیلیش افغانستان اسلام امیرلیگی قانوني مجبوريتی بۉلیب، بوندهی هجوملرنینگ سلبي عاقبتلری اوچون جوابگرلیک قرشی تامانگه یوکلنهدی»
پاکستان تیناوون کېچه شرقي افغانستاندهگی پکتیکا و ننگرهار ولایتلریدهگی یېتّی نقطهگه هجوم قیلگن.
طالباننینگ معلوم قیلیشیچه، بو هجوملرده دیني جایلر و اویلر نشانگه آلینگن و کمیده 17 کیشی، جملهدن ننگرهارده 11 باله هلاک بۉلگن.
شو بیلن بیرگه، پاکستان تشقی ایشلر وزیرلیگی بو هجوملر اۉز مملکتیدهگی طالبان نینگ یشیرین جایلری و پوستهلریگه قرهتیلگنینی بیلدیرگن.
پاکستاننینگ ایتیشیچه، بو هجوملر مملکتیدهگی طالباننینگ سۉنگگی هجوملریگه جواب صفتیده، اسلام آباد، باجور و بنو حدودلریده عملگه آشیریلگن.
پاکستان رسميلری بیر نېچه بار افغانستان حدودیدن فایدهلنیب، پاکستانگه قرشی طالبان حرکتلری هجوم قیلگنینی ادعا قیلگن.
اما طالبان افغانستانده پاکستان طالبانی حرکتینینگ موجودلیگینی انکار قیلهدی و هېچ قندهی گروهگه اۉز توپراغیدن باشقه دولتلرگه قرشی فایدهلنیشگه رخصت بېرمسلیکلرینی بیلدیرهدی.
