پاکستاننینگ افغانستان شرقیدهگی پکتیکا و ننگرهار ولایتلریگه قیلگن هوا هجوملری افغانستاننینگ قطار سیاسي رهبرلری تامانیدن کېسکین مناسبتلرگه سبب بۉلدی و کېسکینلیک ینه-ده کوچهییشیدن جدّي خواطرلرنی کېلتیریب چیقردی.
مملکت سابق جمهور رییسی حامد کرزی، اوشبو هجوملرنی قتّیق قارهلب، اولرنی افغانستان حاکمیتینینگ آچیقدن-آچیق بوزیلیشی دېب بهالهدی.
او پاکستاندن افغانستانگه نسبتاً سیاستینی قَیته کۉریب چیقیشنی همده «یخشی و مدنیتلی قۉشنیچیلیک» یۉلینی تنلشنی سۉرهدی.
شونینگدېک، افغانستان سابق حکومتیدهگی ملي یرهشوو عالي کېنگشی رئیسی عبدالله عبدالله هم هجوملرنی قارهلب، بوندهی حرکتلر افغانستان نینگ ملي حاکمیتی و یېر یخلیتلیگیگه ضد اېکنینی، اولر بېقرارلیک و بحران نینگ کېنگهییشیگه آلیب کېلیشینی تأکیدلهدی.
عبدالله عبدالله شوندهی دېدی:« بامباردمان، تینچ اهالینینگ نشانگه آلینیشی و زۉرآورلیک یېچیم اېمس. ایکّی دولت اۉرتهسیدهگی معمالرنی حل قیلیش نینگ اېنگ تۉغری یۉلی ملاقات دیر»
افغانستاننینگ بیرلشگن ملتلر تشکیلاتی حضوریدهگی افغانستان وکالتخانهسی هم هجوملرنی قارهلب، اولرنی «بیرلشگن ملتلر تشکیلاتی نظامی تمایللری نینگ، خصوصاً یېر یخلیتلیککه حرمت پرینسیپی نینگ، شونینگدېک خلق ارا بشری حقوق نینگ مستحکم معیارلرینینگ بوزیلیشی» دېب اتهدی.
مذکور نمایندهلیکنینگ بیاناتیده ایتیلیشیچه: «تروریزمگه قرشی کورهش پرینتسیپلرگه اساسلنگن، ایزچیل و خلقارا حقوققه تۉلیق ماس بۉلیشی کېرهک. تنلب یاندشوولر و ایکّی یوزلمه مېزانلر اېکسترېمیستیک ترماقلرنی کوچهیتیرهدی و منطقوي تینچلیک همده برقرارلیکنی ینه-ده ضعیفلشتیرهدی»
نمایندهلیک پاکستان حکومتیدن خلق ارا حقوق دایرهسیده حرکت قیلیشنی، بیرلشگن ملتلر تشکیلاتی نظامی و یخشی قۉشنیچیلیک تمایللریگه رعایه اېتیشنی همده افغانستان نینگ توپراغی یخلیتلیگیگه حرمت بیلن یاندهشیشنی طلب قیلدی.
شونینگدېک، بیاناتده افغانستان و منطقهده تینچلیک همده برقرارلیک خلق ارادهسی و آرزو-اینتیلیشلرینی عکس اېتتیرووچی، قانوني، حسابدار حکومتنی شکللنتیریش یۉلیدهگی قۉشمه سعی-حرکتلرسیز امکانسیز اېکنی تأکیدلندی.
افغانستان سابق حکومتیدهگی باشقه سیاستچیلر و منصبدار شخصلر هم پاکستان هجوملرینی قارهلب، اولرنی ملي حاکمیت نینگ بوزیلیشی دېب بهالشدی.
پاکستان کېچه افغانستان شرقیدهگی پکتیکا و ننگرهار ولایتلریدهگی اَیریم حدودلرگه هوا هجوملری اویوشتیردی.
پاکستان اخبارات وزیرلیگی معلوماتیگه کۉره، هجوملر پاکستان طالبانی مرکزلری و یشیرین مسکنلریگه قرهتیلگن.
وزیرلیک نینگ بیلدیریشیچه، بو هجوملر اسلام آباد، باجور و بنو منطقهلریده صادر اېتیلگن سۉنگگی هجوملرگه جوابن عملگه آشیریلگن بۉلیب، اولرنینگ مسوولیتینی تحریک طالبان پاکستان (تیتیپی) اۉز ذمّهسیگه آلگن.
پاکستان تامانی هجوملر «انیقلیک و احتیاطکارلیک بیلن» عملگه آشیریلگنینی تأکیدلهگن.
اما طالبان مدافعه وزیرلیگی هجوملرده بیر نېچته دیني مسکنلر و تورر جایلر نشانگه آلینگنینی معلوم قیلدی.
طالبان معلوماتیگه کۉره، ننگرهارده 17 کیشی، جملهدن 11 باله هلاک بۉلگن، پکتیکادهگی قربانلر حقیده اېسه حاضرچه انیق تفصیلاتلر بېریلمهگن.
اۉتگن ییل نینگ آکتبر آییده هم پاکستان نینگ کابل و پکتیکاگه قیلگن هوا هجوملریدن سۉنگ، پاکستان و طالبان تخمیناً بیر هفته دوامیده تۉقنهشوولرگه کیریشگن اېدی.
تورکيه و قطر واسطهچیلیگیده تامانلر اۉت آچیشنی تۉختهتیش تۉغریسیده کېلیشووگه اېریشیب، استانبول، دوحه و سعوديه عربستانیده مذاکرهلر اۉتکزیشگن.
بیراق اوشبو مذاکرهلرده تامانلر کېلیشووگه اېریشه آلمهدی و مناسبتلر هنوز ترنگلیگیچه قالماقده.
حاضرده افغانستان و پاکستان اۉرتهسیدهگی قوروقلیک چېگرهسی قریب بېش آیدن بېری یاپیق، سودا و قتناولر اېسه تۉختهب قالگن.
