طالبلرنینگ ننگرهاردهگی اخبارات و مدنیت ادارهسینینگ معلوم قیلیشیچه، پاکستاننینگ هوا هجوملریده بهسود اولسواللیگیده۱۷ کیشی، جملهدن۱۱ باله جان بېرگن و 5 کیشی یرهلنگن.
ننگرهاردهگی اخبارات و مدنیت ریاستی اخبارات بۉلیمی آمری قرېشی بدلون نینگ ایتیشیچه، کېچه، شنبه۲ حوت ده ساعت۱۲:۰۰ اطرافیده پاکستان اوردوسی نینگ اوچاقلری خوگیانی، غنیخیل و بهسود اولسواللیکلرینی بامباردمان قیلگن.
اونینگایتیشیچه، بهسود اولسوالیگیدهگی «گردی-کچ» حدودیدهگی بیر تینچ اهالی اویی مقصد قیلیب آلینگن بۉلیب، نتیجهده۱۷ کیشی، جملهدن۱۱ باله هلاک بۉلگن و 5 کیشی جراحت آلگن.
پکتیکا منبعلریگه کۉره، کېچهسی برمل اولسواللیگینینگ مرغه حدودیده هم پاکستان جېتی هوا هجوملری عملگه آشیرگن.
اوشبو منبعگه کۉره، بو هجوملرده بیر دیني مدرسه هم مقصد قیلینگن. پکتیکادهگی قربانلر سانی انیق اېمس.
پاکستان اخبارات و مدنیت وزیرلیگی اېسه سۉنگگی اۉزین-اۉزی پارتلتیش هجوملریگه جوابن، پاکستاندهگی طالبان پوستهلری و اولرنینگ حوالهدارلریگه قرشی چېگره بۉیلب استخبارات اساسیده هجوملر اویوشتیریلگنینی بیلدیرگن.
طالبان مدافعه وزیرلیگی اېسه بو هجوملرده ننگرهار و پکتیکادهگی اویلر همده بیر دیني مدرسه مقصد قیلینگنینی و اۉنلب تینچ اهالی نینگ، جملهدن عیاللر و بالهلرنینگ هلاک بۉلگنینی بیلدیرگن.
وزیرلیکنینگ ایتیشیچه، تینچ اهالی و دیني مرکزلرگه قیلینگن هجوملر پاکستان اوردوسینینگ اخبارات و خوفسیزلیکدهگی ضعیفلیکلری نینگ یقّال دلیلی دیر.
بیر نېچه آی آلدین هم پاکستان کابل و افغانستان چېگره حدودلریگه هوا هجوملرینی عملگه آشیرگن. اوشبو هجوملرگه جوابن، طالبان پاکستان چېگره بندرلریگه هجوم قیلگن و بیر هفته دوامیده پاکستان حربيلری بیلن تۉقنهشوولر بۉلگن. اوشبو تۉقنهشوولر بعضی دولتلر واسطهچیلیگیده تۉختهتیلگن، اما کابل و اسلام آباد اۉرتهسیدهگی ترنگلیک سقلنیب قالگن و کېچهگی هجوملر بیلن ینه-ده کوچهیگن.
