اۉزبېکستان تشقی ایشلر وزیری بختیار سعیدوف تیلفون آرقهلی طالبلر تشقی ایشلر وزیری امیرخان متقي بیلن بۉلگن صحبتده «افغان ترانس» لایحهسی نینگ تخنیکي-اقتصادي اساسلش تدقیقاتلری یقین آرهده باشلنیشینی معلوم قیلگن.
طالبلر تشقی ایشلر وزیرلیگی ترقتگن بیاناتگه کۉره، اوشبو تیلفون صحبتی تیناوون (شنبه،۲ حوت) بۉلیب اۉتگن.
اوزونلیگی تخمیناً 681 کیلومتر بۉلگن «افغان–ترانس» تېمیر یۉل لایحهسی افغانستان توپراغی آرقهلی مرکزي آسیا مملکتلرینی پاکستاندهگی کراچی و گوادر بندرلری آرقهلی جَنوبي آسیا مملکتلری بیلن باغلشنی کۉزده توتهدی.
مذکور لایحه بۉییچه تخنیکي-اقتصادي اساسلش تدقیقاتلرینی اۉتکزیش حقیدهگی کېلیشوو اۉتگن ییلنینگ جولای آییده طالباننینگ فواید عامه وزیرلیگی، اۉزبېکستان ترانسپورت وزیرلیگی و پاکستان تېمیر یۉللری وزیرلیگی اۉرتهسیده امضالنگن اېدی.
تیلفون ملاقاتی چاغیده طالبان و اۉزبېکستان تشقی ایشلر وزیرلری ایکّی تامانلهمه مناسبتلر همده منطقوي مسألهلرنی هم محاکمه قیلگن.
طالبان تشقی ایشلر وزیری جاري ییلده ایکّی مملکت اۉرتهسیدهگی سیاسي علاقهلر و اقتصادي همکارلیک ینه-ده کېنگهییشیگه امید بیلدیرگن.
طالبان تشقی ایشلر وزیرلیگی بیاناتیگه کۉره، اۉزبېکستان تشقی ایشلر وزیری کابل و تاشکېنت اۉرتهسیدهگی مناسبتلر جوده یخشی حالتده اېکنینی ایتیب، مملکتی طالبان بیلن علاقهلرنی رواجلنتیریشگه علیحده اعتبار قرهتهیاتگنینی تأکیدلهگن.
سۉنگگی تۉرت ییلدن آرتیق وقت مابینیده اۉزبېکستان و طالبان اۉرتهسیده کېنگ قمراولی سیاسي و اقتصادي علاقهلر موجود بۉلیب، همکارلیککه عاید بیر قطار کېلیشوولر امضالنگن.
