بیرلشگن ملتلر تشکیلاتینینگ انسان حقوقلری بۉییچه متخصصلری، جملهدن افغانستان بۉییچه مخصوص گزارشگر عمومي بیاناتیده ایراندهگی ناراضیلیکلر دوامیده حبسگه آلینگن و اۉلدیریلگنلر آرهسیده افغانستان فقرالری هم بار، گرچه حاضرگچه بو بارهده انیق آمار اعلان قیلینمهگن دېگن.
اوشبو متخصصلر: «حاضرگی پیتده ایرانلیک ناراضیلرنی زۉرآورلیک بیلن باستیریشنینگ حقیقي درجهسینی انیقلش ممکن اېمس، رسمي رقملر و خلق بهالری اۉرتهسیدهگی فرق اېسه اۉز یقینلرینی قیدیرهیاتگن عایلهلرنینگ دردینی چوقورلشتیرهدی و انسان حقوقلری و حسابدارلیککه بۉلگن چوقور اعتبارسیزلیکنی کۉرسهتهدی»
ایران حکومتی اوچ مینگ یوز اۉن یېتّی کیشینینگ اۉلدیریلگنینی و تخمیناً اوچ مینگ کیشی نینگ حبسگه آلینگنینی تصدیقلهگن، انسان حقلری تشکیلاتلری اېسه بو رقملرنی اۉن مینگلب کیشیلر دېب بهالهماقده.
یقینده امریکا جمهور باشلیغی دونالد ترامپ اېراننینگ قیسقه مدت ایچیده 32 مینگ کیشینی اۉلدیرگنی حقیده ایتگن.
ایران تشقی ایشلر وزیری عباس عراقچی بو رقمنی رد قیلگن و ترامپدن «دلیل» بیلن گپیریشنی سۉرهگن.
انسان حقوقلری بۉییچه متخصصلر بیاناتیده ایتیلیشیچه، حبسگه آلینگن یاکه اۉلدیریلگنلرنینگ دېیرلی برچهسی عادي فقرالر، جملهدن بالهلر، برچه ولایتلردن و تورلی اېتنیک همده دیني کېلیب چیقیشگه اېگه بۉلگنلر، شونینگدېک افغانستان فقرالری.
اولرنینگ ایتیشلریچه، حبسگه آلینگنلر آرهسیده ناراضیلیکلرنی حمایه قیلگن وکیللر، جراحتلنگنلرنی دوالهگن طبیات متخصصلری، ژورنالیستلر و یازووچیلر، صنعتکارلر و انسان حقوقلری حمایهچیلری هم بار.
متخصصلرنینگ بیلدیریشلریچه، بوتون ایران بۉیلب عایلهلر حلی هم یقینلرینی تاپه آلمهیپتی، اولرنینگ بعضیلری شفاخانهلرده، بعضیلری حبسخانهده یاکه محکمه مرکزلریده اۉلدیریلگنلر آرهسیده بۉلیشی ممکن.
کۉپلب حبسگه آلینگنلرنینگ تنیلگن عایلهلری منتظم علاقهدن محروم قیلینهیاتگنلرینی بیلدیرگن و بو خواطرلرنی آشیرگن.
متخصصلر «اگر دولت آدملرینینگ قهیېردهلیگی بۉییچه جواب بېرمس اېکن، باشقهلر بو بۉشلیقنی تۉلدیرهدی و پیدا بۉلگن تصویر اېران تاریخیده اوشبو دورنی بېلگیلهیدی. اېران خلقی اۉز مملکتیده نیمه صادر بۉلهیاتگنینی بیلیشگه حقلی. جوابسیز قالسه، بیز اېنگ یامان حالتنی تخمین قیلهمیز.»
اوشبو متخصصلر ایران رسميلریدن برچه قتل اېتیشلرنی، جملهدن ناراضیلیکلر بیلن باغلیق قتل اېتیشلرنی درحال تۉختهتیشنی و یۉقالگنلر نینگ تقدیری و قهیېردهلیگینی انیقلشنی سۉرهگنلر.
شونینگدېک، اولر ناراضیلیکلر دوامیده و اوندن کېین اۉز اختیاری بیلن حبسگه آلینگن برچه شخصلرنی آزاد قیلیشنی طلب قیلگنلر.
جدی آییده اېران بۉیلب نرخ-نوا آشیشیگه قرشی باشلنگن ناراضیلیکلر حکومتگه قرشی نمایشلرگه ایلنگن. اوشبو ناراضیلیکلر زۉرآورلیک بیلن باستیریلگن و اېنگ کۉپ زۉرآورلیک۱۸ و۱۹ جدی کونلری عملگه آشیریلگنی ایتیلهدی.
ناراضیلیکلر دوامیده اېران حکومتی بوتونلهی اینترنتنی اۉچیریب قۉیگن اېدی.
حاضرگچه اوشبو ناراضیلیکلر نینگ تلفاتلری بۉییچه تورلی رقملر اعلان قیلیندی.
اېران حکومتی بو ناراضیلیکلرنی ترتیبسیزلیک و ترورچیلیک عملیاتلر دېب اتهیدی.
اېران تشقی ایشلر وزیری ترامپ نینگ بیاناتیگه جوابن، اۉز ایکس اجتماعي ترماغیدهگی صحیفهسیده شوندهی یازگن: «خلقیمیز آلدیده تۉلیق آشکارالیکنی تأمینلش مجبوريتیمیزنی بجریش دایرهسیده، ایران حکومتی یقینده اۉتکزیلگن ترورچیلیک عملیاتلرده قربان بۉلگن برچه۳۱۱۷کیشی نینگ، جملهدن تخمیناً۲۰۰ نفر خوفسیزلیک کوچلری خادملری نینگ تۉلیق رۉیخطینی اعلان قیلگن.»
او دوام اېتتیرگن: «اگر کیمدیر بیز نینگ معلوماتلریمیز نینگ تۉغریلیگیگه شبهه قیلسه، التماس، دلیل بیلن گپیرسین.»
ایران رسميلری اۉلدیریلگن و ناراضیلیکلرده قتنهشگن افغانستان فقرالری سانی بۉییچه هېچ قندهی معلومات بېرمهگن، اما ناراضیلیکلر دوامیده حکومت عامهوي اخبارات واسطهلری بیر نېچه بار چېت اېلّیک فقرالرنینگ حبسگه آلینگنی حقیده خبر بېرگن.
ایران رسميلری۱۲کونلیک اوروش دوامیده افغانستان فقرالرینی کېنگ کۉلملی عیبلاولر بیلن عیبلهگن، جملهدن اولرنی جاسوسلیک و دران اوچیریشده عیبلشگن.
اوشبو اوروشدن سۉنگ ایران یوز مینگلب افغانستان فقرالرینی اولرنینگ اۉلکهلریگه قَیتریب یوبارگن.
