طالبلرنینگ مدافعه وزیری محمدیعقوب مجاهد، اوشبو گروه کوچلرینی قصاص آلیش حقیده اۉیلهمسلیککه و کېلیشماوچیلیکلرنی چېتگه سوریشگه چقیردی.
او بوگون (یکشنبه،۲۶ دلو) افغانستاندن سابق شوروی قۉشینلرینینگ تۉلیق چیقیب کېتگنیگه۳۷ ییل تۉلیشی مناسبتی بیلن اۉتکزیلگن مراسمده سۉزلر اېکن، طالبان جنگچیلریگه مراجعت قیلیب، اگر قصاص آلیش فکریده بۉلسهلر، بو حالت برقرار بۉلمسلیگینی ایتدی.
طالبان مدافعه وزیرینینگ ایتیشیچه «بو فکرنی مییهنگیزدن چیقریب تشلنگ، فلانچی اۉتمیشده مېنگه قرشی بوندهی دېگن، بوندهی ایش قیلگن، اېندی بوگون قصاص آلیش کونی و مېن اوندن قصاص آلیشیم کېرهک»
او شونینگدېک، حاکمیتگه یېتیب باریش آرقهلی قصاص آلیش نیتیده بۉلمسلیککه چقیردی. یعقوب مجاهدنینگ ایتیشیچه، اگر قصاص آلیش فکری موجود بۉلسه، حاضرگی وضعیت برقرار بۉلیب قالمهیدی و اونینگ عاقبتی نیمه بۉلیشینی یخشیلب اۉیلب کۉریش کېرهک.
بو بیاناتلر طالبان افغانستان اوستیدن قَیته حاکمیتنی قۉلگه آلگنیدن بېری، اوشبو گروه کېنگ کۉلمده «قاتللیکلر» و قصاصکارانه مناسبتلرده عیبلنیب کېلینهیاتگن بیر پیتده ینگرهماقده.
بیرلشگن ملتلر تشکیلاتینینگ افغانستاندهگی یاردم ادارهسی (یوناما) گزارشلریگه کۉره، طالبان کوچلری اینیقسه محکمهسیز قتل اېتیش، اۉزباشیمچهلیک بیلن حبسگه آلیش و اوّلگی حکومت عملدارلری همده حربي خدمتچیلرنی قییناققه سالیش حالتلریگه قۉل اورگن.
