افغانستان ژورنالیستلر مرکزی «خلق ارا رادیو کونی» مناسبتی بیلن افغانستانده رادیولر فعالیتیگه قۉییلگن چېکلاولر مثلی کۉریلمهگن درجهده آشگنینی معلوم قیلدی.
مرکز بوگون (جمعه،۲۴ دلو) نشر قیلگن بیاناتیده سۉنگّی بیر ییل ایچیده اَیریم رادیولر تهدید آلگنی، بعضیلری یاپیلگنی همده بیر نېچه رادیو ژورنالیستلری طالبان تامانیدن چقیرتیریلگنی یاکه قماققه آلینگنینی بیلدیرگن.
افغانستان ژورنالیستلر مرکزینینگ قۉشیمچه قیلیشیچه، آخرگی۱۲ آی دوامیده کمیده عیاللرگه خاص ایکّیته محلي رادیو تۉغریدن-تۉغری تهدید آلگن و اولرگه اېندی ایشلشگه رخصت بېریلمسلیگی ممکنلیگی ایتیلگن. ینه ایکّیته رادیو اېسه محلي طالبان ادارهسیگه معقول کېلمهگن دستور و رایورتاژلرنی نشرگه اوزهتگنی سبب یاپیلگن، خادملری اېسه حبسگه آلینگن.
مرکزنینگ بیاناتیگه کۉره، اوشبو رادیولردن بیرینینگ مسوول محرری اجتماعي و اقتصادي مسألهلرنی یاریتگنی اوچون حبسگه آلینیب، اوچ آی قماقده سقلنگن.
شونینگدېک، اَیریم مخبرلر «اذان وقتیده ایشلهگنی، یازمه و آنلاین رایورتاژلرده عیاللر صورتینی قۉشگنی یاکه سقالی یۉقلیگی یاخود قیسقهلیگی سبب» حبسگه آلینگنی ایتیلگن.
مرکز شونینگدېک، طالبان رادیولر فعالیتی مجوزینی اوزهیتیریش جریانیده، اینیقسه رهبرلری یاکه اېگهسی عیاللر بۉلگن رادیولر اوچون کۉپلب تۉسیقلر یرهتگنینی بیلدیرگن.
افغانستان ژورنالیستلر مرکزی معلوماتیگه کۉره، بو رادیولر تۉغریدن-تۉغری و بالواسطه باسیم آستیده قالماقده همده عیال رهبرلر اۉرنیگه اېرککلرنی تعیینلش طلبی قۉییلماقده.
مرکز ینه شونی تاکیدلهگنکی، رادیولرنینگ اساسي مالیوي منبعی بۉلگن ریکلام درآمدلری کېسکین کمهیگن بیر پیتده، طالبان رادیو فعالیتیگه سالینهدیگن سالیقلرنی آشیرگن.
مرکز معلوماتیگه کۉره، حاضرده افغانستان بۉیلب قریب ۲۰۰ ته رادیواستیشن فعالیت یوریتماقده و اولر تون و کون، یریم کونلیک یاکه کونیگه بیر نېچه ساعت نشراتگه چیقماقده.
افغانستان ژورنالیستلر مرکزی طالباندن عامهوي اخبارات واسطهلریگه، اینیقسه رادیولرگه قۉییلگن چېکلاولرنی بېکار قیلیشنی و اولرگه ژنالیستیکه تمایللری اساسیده اېرکین فعالیت یوریتیشگه رخصت بېریشنی سۉرهگن.
