بیرلشگن ملتلر تشکیلاتینینگ افغانستاندهگی یاردم ادارهسی (یوناما)نینگ سرپرستی جورجت گانیون، رادیو افغانستان خلقی حیاتیده چوقور و اوزاق دوام اېتهدیگن رۉل اۉینهگنینی ایتدی.
جورجت گانیون خانم بوگون (جمعه، ۲۴-دلو) «بوتون جهان رادیو کونی» مناسبتی بیلن قیلگن بیاناتیده بیر عصردن آرتیق وقت دوامیده رادیو افغانستان خلقی اوچون ایشانچلی اخبارات، تعلیم و علاقه منبعی بۉلیب کېلگنینی تأکیدلهدی.
اونینگ قۉشیمچه قیلیشیچه، حاضر هم رادیو افغانستاندهگی میلیونلب انسانلر، اینیقسه قیشلاق و آلیس حدودلرده یشاوچیلر اوچون اساسي اخبارات منبعی حسابلنهدی.
یوناما رهبرینینگ ایتیشیچه، بو ییلگی بوتون جهان رادیو کونی شعاری «رادیو و صنعي ذهن»دیر. بیراق تکنالوژي اخبارات ایشلب چیقریش و ترقهتیش اصوللرینی اۉزگرتیرگن بۉلسه-ده، ایشانچ هنوز انسان آوازیگه، ژورنالیستلر، باشلاوچیلر و مدیا خادملری آوازیگه تهیهنهدی.
جورجت گانیون افغانستاندهگی رادیو خادملری و متخصصلریگه، کۉپلب قیینچیلیکلرگه قرهمهی اۉز ایشلرینی دوام اېتتیرهیاتگنلری اوچون منّتدارلیک بیلدیریب، بیرلشگن ملتلر تشکیلاتی نینگ اولر بیلن بیردملیگینی اعلان قیلدی.
طالبان حاکمیتگه قَیتگنیدن سۉنگ عامهوي اخبارات واسطهلری، جملهدن رادیولر فعالیتیگه کېنگ کۉلملی چېکلاولر جاري اېتیلدی و کۉپلب رادیو ترماقلری اۉز فعالیتینی تۉختهتیشگه مجبور بۉلدی.
شو بیلن بیرگه، طالبان تامانیدن جانلی تصویرنی نشراتگه اوزهتیش تعقیقلنگنی سببلی، مملکت نینگ۲۰ دن آرتیق ولایتیده تلویزیون واسطهلری یاکه فعالیتینی تۉختهتگن، یاکه رادیو و اېشیتتیریش (اودیو) فورمتیگه اۉتگن.
