افغانستاننینگ بیرلشگن ملتلر تشکیلاتیدهگی دایمي نمایندهلیگی، حاضرچه سابق حکومت دیپلوماتلری نظارتیده بۉلیب، بیرلشگن ملتلر تشکیلاتی خوفسیزلیک کېنگشی تامانیدن طالبان اوستیدن چېکلاولرنی نظارت قیلووچی گروه مدتینینگ اوزهیتیریلگنینی ممنونیت بیلن قرشی آلدی.
نمایندهلیک بیانات نشر قیلیب، اوشبو مدتنینگ اوزهیتیریلیشی افغانستاندهگی وضعیت هنوز خلقارا همجعیت اوچون تشویش منبعی اېکنینی کۉرسهتیشینی تأکیدلهدی.
افغانستان نینگ بیرلشگن ملتلر تشکیلاتیدهگی نمایندهلیگی شونینگدېک، چېکلاولرنی نظارت قیلووچی گروه مدتینینگ اوزهیتیریلیشی افغانستان هنوز خلقارا تینچلیک و خوفسیزلیک بیلن باغلیق مسأله بۉلیب قالهیاتگنینی و دایمي گلوبل اعتبارنی طلب قیلیشینی انگلهتیشینی بیلدیردی.
بیرلشگن ملتلر تشکیلاتی خوفسیزلیک کېنگشی کېچه قبول قیلینگن قراری آرقهلی طالبان اوستیدن چېکلاولرنی نظارت قیلووچی گروه مدتینی ینه بیر ییلگه اوزهیتیردی.
وکالتخانهنینگ معلوم قیلیشیچه، اوشبو قرارده افغانستان توپراغی هېچ بیر دولتگه قرشی تهدید یاکه هجوم اوچون فایدهلنیلمسلیگی کېرهکلیگی آچیق تأکیدلنگن همده طالباندن تروریستیک گروهلرگه قرشی فعال، انیق و تېکشیریلیشی ممکن بۉلگن چارهلرنی کۉریش طلب قیلینگن.
نمایندهلیک نینگ قۉشیمچه قیلیشیچه، بو موضع جوابگرلیک و تېکشیریلهدیگن عملي چارهلرنی منطقوي همده خلقارا برقرارلیک نینگ اساسي عنصرلری صفتیده مستحکملهیدی.
بیاناتگه کۉره، اوشبو موضوع دایرهسیده انسانپرورلیک یاردملری و اهالینینگ اساسي احتیاجلرینی تأمینلهیدیگن مهم فعالیتلر طالبانگه قرشی چېکلاولرنی بوزیش حسابلنمهیدی.
شونینگدېک، انسانپرورلیک یاردمی اوچون تۉلیق، خوفسیز، تېزکار و تۉسیقسیز کیریش امکانینی تأمینلش، جملهدن عیال یاردم خادملری نینگ مضمونلی اشتراکینی قۉللب-قوّتلش طلب قیلینگن.
وکالتخانه نینگ تأکیدلشیچه، بو افغانستاندهگی انساني و اقتصادي وضعیت نینگ ینه-ده آغیرلشووی نینگ آلدینی آلیش اوچون نهایتده مهمدیر.
افغانستاننینگ بیرلشگن ملتلر تشکیلاتیدهگی وکالتخانهسی، شونینگدېک، خوفسیزلیک کېنگشینینگ اینکلیوزیو باشقروو و انسان حقوقلریگه، اینیقسه عیاللر و قیزلر، دیني همده اېتنیک آزچیلیکلر و باشقه ضعیف گروهلر حقوقلریگه تۉلیق رعایه اېتیش بارهسیدهگی تأکیدینی هم آلقیشلهدی.
نمایندهلیکنینگ قۉشیمچه قیلیشیچه، افغانستانده برقرار تینچلیک و اوزاق مدتلی برقرارلیک برچه فقرالرنینگ تېنگ اشتراکی و حقوقلرینی حمایه قیلمسدن توریب عملگه آشمهیدی.
