بیرلشگن ملتلر تشکیلاتینینگ افغانستاندهگی یاردم ادارهسی (یوناما) هیاتی اوشبو وکالتخانه نینگ رهبر اۉرینباسری ایندریکا راتواته، باشچیلیگیده، اسلام آبادگه سفری چاغیده پاکستاننینگ افغانستان بۉییچه مخصوص نمایندهسی بیلن اوچرهشیب، مذاکره اۉتکزدی.
پاکستاننینگ مخصوص نمایندهسی محمد صادق بوگون (پنجشنبه،۲۳ دلو) ایکس اجتماعي ترماغیده یازیشیچه، او بیرلشگن ملتلر تشکیلاتی هیاتی بیلن انسان حقوقلرینینگ حاضرگی حالتی، خوفسیزلیکدهگی اۉزگریشلر، سودا و باشقه مهم منطقوي مسألهلر یوزهسیدن صحبتلشگن.
اونینگ یازیشیچه، پاکستاننینگ فرا مرزی تروریزم و افغانستانده جایلشگن ترورچی گروهلر فعالیتیدن کېلیب چیقهیاتگن جدّي خوفسیزلیک معمالری بارهسیدهگی موضعی نی تأکیدلهگن.
محمد صادقنینگ قۉشیمچه قیلیشیچه، «بیز افغانستان توپراغیدن هېچ بیر دولتگه قرشی فایدهلنیلمسلیگینی تأمینلش مهملیگینی همده اوشبو عمومي تهدیدگه قرشی کورهشیشده منطقوي و خلقارا درجهده موافقلشتیریلگن سعی-حرکتلر ضرورلیگینی تأکیدلهدیک.»
اوشبو پاکستانلیک دیپلومات ینه شونی ایتگنکی، اوچرهشووده برقرارلیکنی مستحکملش انسان پرورلیک یاردمنی قۉللب-قوّتلش، تروریزمگه قرشی کورهشده موافقلیک و منطقهده برقرار اقتصادي رواجلنیشنی ایلگری سوریش اوچون دایمي ملاقات و همکارلیکنینگ اهمیتی قید اېتیلگن.
