طالبلر خلق ارا شفّافلیک تشکیلاتینینگ افغانستاندهگی فسادنینگ آشیشی حقیدهگی حساباتینی «تخمیني و ناانیق» دېب اتهدی.
طالبان مطبوعات سۉزلاوچیسی اۉرینباسری حمدالله فطرت بوگون (چهارشنبه،۲۲ دلو) اعلان قیلگن بیاناتیده ایتیشیچه، بو گروه «اداری فسادنی یۉق قیلیش و شفّافلیکنی تأمینلش بۉییچه انیق چارهلر کۉرگن و مملکتدهگی فساد سېزیلرلی درجهده کمهیگن».
خلق ارا شفّافلیک تشکیلاتینینگ سۉنگّی گزارشیگه کۉره، افغانستان 2025 ییلده گوبل فسادگه قرشی کورهش ردهبندلیگی بۉییچه تۉرت پاغانه توشیب، دنیا شاخصیده 169-اۉرینگه توشگن. 2024 ییلده اېسه افغانستان 165-اۉرینده اېدی.
گزارشده قید اېتیلیشیچه، افغانستان مدنی اېرکینلیکلری چېکلنگن، مالیوي تیزیم شفّاف اېمس، دموکراتیک موازنت و مستقل محکمه حاکمیتی یۉقلیگی سببلی فسادگه نسبتاً ضعیف مملکتلردن بیری حسابلنهدی.
طالبان مطبوعات سۉزلاوچیسی اۉرینباسری نینگ تأکیدلشیچه، خلق ارا شفّافلیک تشکیلاتی افغانستانده فعالیت یوریتمهیدی و «میدان تدقیقاتلری و ایشانچلی منبعلرگه تهیهنیش اۉرنیگه تخمیني خلاصهلر چیقرهدی، بو اېسه انیق اېمس».
اونینگ قۉشیمچه قیلیشیچه، «امید قیلهمیز، اولر کېلیب کۉرهدیلر، اسلامي امیرلیک (طالبان حکومتی) اداری جریانلرنی تکامللشتیریش، فسادنی یۉق قیلیش و شفّافلیکنی تأمینلش بۉییچه قنچهلیک ثمرهلی ایشلر قیلگنینی اۉز کۉزلری بیلن کۉرهدیلر».
طالبان افغانستاننی قَیته اېگهلهگندن بېری بیر نېچه بار اداری فسادنی یۉق قیلگنینی دعوا قیلگن، اما یشاوچیلر هنوز دولت ادارهلریده کېنگ ترقهلگن فساد موجودلیگیدن شکایت قیلماقده.
