طالبلر تشقی ایشلر وزیرلیگی افغانستاننینگ خصوصي سکتورینی قۉللب-قوّتلش ایشچی گروهینینگ اوچینچی ییغیلیشی حضوری و آنلاین طرزده اۉتکزیلگنینی معلوم قیلدی.
طالبلر تشقی ایشلر وزیرلیگی مطبوعات سۉزلاوچیسینینگ اۉرینباسری ضیا احمد تکل بوگون (سهشنبه،۲۱دلو) اعلان قیلگن بیاناتیده، اوشبو ییغیلیش بیرلشگن ملتلر تشکیلاتینینگ افغانستاندهگی نمایندهلیگی (یوناما) اۉرینباسرلیک ادارهسی تامانیدن کابلدهگی بیر هتل تشکیل اېتیلگنینی یازگن.
اونینگ قۉشیمچه قیلیشیچه، ییغیلیشده طالبان ادارهلری، یوناما، بیرلشگن ملتلر تشکیلاتی، خلقارا و منطقوي تشکیلاتلر، اېلچیلر، مملکتلر وکیللری و دیپلوماتلری همده تېگیشلی کارشناسلر حضوری و آنلاین اشتراک اېتگن.
تشقی ایشلر وزیرلیگی مطبوعات کاتبینینگ اۉرینباسری ییغیلیشده ایکّی یۉنهلیشده «اۉسیش و شمولیت» همده «موافقلیک و شفّافلیک» مسألهلریده مذاکرهلر اۉتکزیلگنینی بیلدیرگن.
اونینگ قۉشیمچه قیلیشیچه، طالبان وکیللری اۉزلرینینگ تۉرت ییللیک یوتوقلرینی تقدیم قیلگن و اشتراکچیلر اوشبو گروه بیلن همکارلیکنی دوام اېتتیریشگه تیارلیگینی بیلدیریشگن.
ضیا احمد تکل نینگ ایتیشیچه، برچه تامانلر معمالرنی حل قیلیش بۉییچه تکلیفلر بېرگن و ینه-ده کوچلی موافقلیککه اورغو بېریلگن.
افغانستان خصوصي سکتورینی قۉللب-قوّتلش ایشچی گروهی اوچینچی ییغیلیشی بیرلشگن ملتلر تشکیلاتی باشچیلیگیدهگی دوحهدهگی افغانستان جریانی دایرهسیده تشکیل اېتیلگن.
اوشبو ایشچی گروهده مملکت وکیللری، طالبان رسميلری و خلقارا تشکیلاتلر افغانستاننینگ خصوصي سکتورینی قۉللب-قوّتلش و یوزهگه کېلگن معمالرنی محاکمه قیلهدیلر.
اوشبو ییغیلیشدن آلدین کابلده گیاهوند مادّهلر بیلن کورهشیش ایشچی گروهی نینگ تۉرتینچی ییغیلیشی هم اۉتکزیلگن اېدی.
بو ییغیلیشلر بیرلشگن ملتلر تشکیلاتی باش کاتبی نینگ سیاسي مسألهلر بۉییچه اۉرینباسری رز ماری دیکارلونینگ کابل سفری و طالبان رسميلری بیلن مذاکرهلری آرتیدن تشکیل اېتیلگن.
