بیرلشگن ملتلر تشکیلاتینینگ «باله حقلری کمیتهسی» سۉنگگی حساباتیده پاکستاندن کۉپلب افغانستانلیک مهاجر بالهلرنینگ، جملهدن، همراهسیز بالهلرنینگ چیقریب یوباریلهیاتگنیدن خواطر بیلدیرگن.
کمیتهنینگ تأکیدلشیچه، بو دیپورتلر بالهلرنی جدّي انسان حقوقلری بوزیلیشلری، جملهدن عایلهدن اجرهلیش، استثمار و سوءاستعمال خوفی آستیده قالدیرماقده.
بیرلشگن ملتلر تشکیلاتینینگ «باله حقلری کمیتهسی» پاکستان حکومتیدن ملي قاچقینلر تۉغریسیدهگی قانوننی قبول قیلیشنی و اینیقسه افغانستانلیک قاچقین بالهلرنی رۉیخطدن اۉتکزیش همده اولرگه اوزاق مدتلی یېچیملر تقدیم اېتیش اوچون باشپناه یرهتیشنی سۉرهگن.
شونینگدېک، کمیته پاکستان حکومتیدن مجبوري قَیتریب یوبارمسلیک تمایلیگه رعایه قیلیشنی و بالهلرنی جدّي خوفلرگه دچار قیلهیاتگن ناقانوني خارجي فقرالرنی قَیتریش رېجهسینی قَیته کۉریب چیقیشنی طلب قیلگن.
پاکستان حکومتی ناقانوني مهاجرلرنی چیقریب یوباریش رېجهسی دایرهسیده اۉتگن ییل دوامیده افغانستانلیک مهاجرلرنی دېپورت قیلیشنی کېسکین کوچهیتیردی.
بیرلشگن ملتلر تشکیلاتی معلوماتلریگه کۉره، پاکستان 2025 ییلده 1،5 میلیوندن آرتیق مهاجرنی افغانستانگه چیقریب یوبارگن. اولرنینگ کۉپچیلیگی بوتون عمرینی پاکستانده اۉتکزگن، حتا بیر مرته هم افغانستانگه بارمهگن شخصلر بۉلگن.
افغانستانلیک مهاجرلر پاکستاندن چیقریب یوباریش جریانی هنوز دوام اېتماقده. طالبان معلوماتلریگه کۉره، تیناوون یکشنبه کونی پاکستاندن 3 مینگ 300 دن آرتیق مهاجر دېپورت قیلینیب، افغانستانگه کیریب کېلگن.
