پاکستان جمهور رییسی آصف علی زرداري، افغانستان طالبان باشقرووی آستیده «۱۱-سپتمبردن آلدینگی دورگه اۉخشش یاکه اوندن هم یامان شرایطلرگه» قَیتیب بارماقده دېب آگاهلنتیرگن.
اکسپرس تریبون خبریگه کۉره، پاکستان جمهورلیک ریاستی تامانیدن اعلان قیلینگن بیاناتده زرداري افغانستان توپراغیدن فعالیت یوریتهیاتگن ترورچی تشکیلاتلر منطقوي و گوبل تینچلیک اوچون جدّي تهدید توغدیرهیاتگنینی ایتگن.
او زۉرآورلیک و اېکسترېمیستیک مفکورهگه قرشی خلق ارا مقیاسده جماعهوي چارهلر کۉریشگه چقیرگن.
بیاناتده اونینگ سۉزلریدن قوییدهگیلر کېلتیریلهدی «پاکستان طالبان رژیمی افغانستانده ۱۱-سپتمبردن آلدینگی دورگه اۉخشهش یاکه اوندن هم یامان شرایطلرنی یرهتگنینی قتّيق تنقید قیلهدی. اۉشه پیتده ترورچی تشکیلاتلر جهان تینچلیگیگه تهدید سالگن و آخر-عاقبت ۱۱- سپتمبر فاجعهسیگه آلیب کېلگن اېدی»
۲۰۰۱-ییل ۱۱-سپتمبرده نیویارک شهریده جایلشگن اېگیزهک منارهلرگه اویوشتیریلگن هجوملر، القاعده تامانیدن موافقلشتیریلگن اوچاقلرنی آلیب قاچیش آرقهلی عملگه آشیریلگن بۉلیب، اوچ مینگگه یقین انساننینگ حیاتیگه ضامن بۉلگن.
اوشبو هجوملردن سۉنگ گلوبل خوفسیزلیک سیاستی اۉزگردی و امریکا همده اونینگ غربي اتفاقچیلری تروریزمگه قرشی کورهش بهانهسی بیلن افغانستانگه باستیریب کیریب، طالبان نینگ بیرینچی رژیمینی اغدریشدی.
۲۰۲۱-ییلده امریکا و ناتو کوچلری افغانستاندن چیقیب کېتگچ، طالبان ینه حاکمیتگه قَیتدی.
پاکستان جمهور رییسینینگ تأکیدلشیچه، پاکستان دایما شونی ایتیب کېلهدیکی، هېچ بیر دولت یالغیز اۉزی تروریزمگه قرشی کورهشه آلمهیدی.
اونینگ ایتیشیچه، اگر ترورچی گروهلرگه ملي چېگرهلردن تشقریده مکان، قولهیلیک یاکه جزادن دخلسیزلیک بېریلسه، بونینگ عاقبتلری بېگناه تینچ اهالی ذمّهسیگه توشهدی.
پاکستان جمهور رییسینینگ قۉشیمچه قیلیشیچه، اَیریم قۉشنی دولتلر اۉز توپراغیدن پاکستانگه قرشی ترورچی عنصرلرنینگ حرکت قیلیشیگه رخصت بېریب، «افسوسکی، جنایتگه شریک بۉلیشگن»، شو بیلن بیرگه، بعضیلری تۉغریدن-تۉغری مالیوي یاردم، شونینگدېک تخنیکي و حربي کۉمک کۉرسهتگن.
او شوندهی دېدی: «بو سۉنگگی ییللرده منطقوي جریانلرنی شکللنتیرگن حقیقت دیر» شونینگدېک، او هندستاننی طالبان رژیمیگه یاردم بېریشده، نهفقط پاکستانگه، بلکه منطقوي و گلوبل تینچلیککه هم تهدید سالیشده عیبلهدی.
پاکستاننینگ ایتیشیچه، طالبان افغانستانده حاکمیتگه قَیتگچ، پاکستاندهگی هجوملر سانی آشگن. بو دولت هندستاننی پاکستاندهگی قوراللی گروهلرنی قۉللب-قوّتلشده عیبلهیدی و افغانستان طالبانی بو جریانده واسطهچی رۉلینی اۉینهیاتگنینی تأکیدلهیدی.
جمعه کونی اسلام آباددهگی مسجدگه قیلینگن هجومدن سۉنگ، پاکستان مدافعه وزیری خوجه آصف اوشبو هجومده هندستان و طالبان نظارتیدهگی افغانستان ایزلرینی کۉرهیاتگنینی ایتدی.
پاکستان رسميلرینینگ دعوا قیلیشیچه، اۉزینی پارتلهتگن هجومچی ایلگری افغانستانگه سفر قیلگن. سۉنگگی معلوماتلرگه کۉره، یقینده صادر بۉلگن هجوم بیلن باغلیق حالده تۉرت کیشی، جملهدن بیر افغانستان فقراسی حبسگه آلینگن.
طالبان و هندستان اېسه سۉنگگی هجومنی قارهلب، پاکستان حکومتیدن باشقهلرنی عیبلش اۉرنیگه اۉز ایچکی معمالرینی حل قیلیشنی طلب قیلگن.
