طالبان و هندستان رسميلری، پاکستان مدافعه وزیرینینگ اسلام آباددهگی مسجدده صادر بۉلگن اۉلدیرووچی پارتلشده هندستان و افغانستان ایزلری بارلیگینی ادعا قیلگن بیاناتیگه جواب بېریب و پاکستان باشقه دولتلرنی عیبلش اۉرنیگه ایچکی معمالریگه اعتبار قرهتیشی کېرهک، دېییشدی.
جمعه کونی صادر بۉلگن بو پارتلش، اۉزینی اۉلدیریش هجومی بۉلیب، شیعه نمازخوانلرینی نشانگه آلگن، کمیده ۳۱ کیشی هلاک بۉلگن و اۉنلب آدملر یرهلنگن.
داعش گروهی اوشبو هجومنی اۉز ذمّهسیگه آلگن و اۉزینینگ اۉلدیرووچی هجومچیسی صورتینی هم نشر قیلگن.
پاکستان مدافعه وزیری خواجه آصف او هندستان و طالبان نظارتیدهگی افغانستان ایزلرینی اوشبو هجوم آرتیده کۉرماقده. اونینگ تاکیدلشیچه، دستلبکی تېرگاولر هجومچینینگ بیر نېچه مرته افغانستانگه سفر قیلگنینی کۉرسهتگن.
«اۉتگن ییل می آییدهگی شرمندهلی مغلوبیتدن کېین هندستان اېندی بالواسطه کوچلر آرقهلی اوروش آلیب بارماقده، چونکه تۉغریدن-تۉغری اوروش قیلیش جرعتی یۉق»
پاکستان ایچکی ایشلر مصلحتچیسی طلال چودری مطبوعات انجمنیده، هجومچی انیقلنگن، او افغانستان فقراسی اېمس، لېکن بیر نېچه بار افغانستانگه سفر قیلگن دېدی.
طالبان مدافعه وزیرلیگی سۉزلاوچیسی عنایتالله خوارزمی« بوندهی بیاناتلر و افغانستانگه عیبلاولر هېچ قندهی منطقي یاکه اساسگه اېگه اېمس. شاشیلینچ سۉزلر بیلن نه خوفسیزلیکدهگی موفقیتسیزلیکلرنی یشیریش، نه معمالرنی حل قیلیش ممکن» دېگن.
اونینگ قۉشیمچه قیلیشیچه، پاکستان خوفسیزلیک اۉرگانلری موفقیتسیزلیکلردن قاچیش و جماعتچیلیکنی چلغیتیش اۉرنیگه اۉز وظیفهلرینی تۉغری بجریشی، سیاستلرینی قَیته کۉریب چیقیشی و خلقینی و قۉشنی دولتلرنی قرهمه-قرشی قۉییش اۉرنیگه، ایجابي همکارلیک روحینی رواجلنتیریشی کېرهک.
هندستان تشقی ایشلر وزیرلیگی سۉزلاوچیسی راندیر جایسوال بو هجومنی قارهلب، جبرلنگنلرنینگ عایلهلریگه همدردلیک بیلدیریب قۉشیمچه قیلگن.
«افسوسکی، پاکستان اۉز اجتماعي معمالریگه جدّي اعتبار بېریش اۉرنیگه، باشقه دولتلرنی ایچکی معمالرینینگ عیبداری صفتیده کۉرسهتیشنی تنلهیپتی»
او هندستان برچه عیبلاولرنی قطعي رد اېتهدی، دېب قۉشیمچه قیلگن: بولرنینگ همهسی اساسسیز و فایدهسیز.
پاکستان رسميلرینینگ ایتیشیچه، طالبان حاکمیتگه قَیتگندن کېین پاکستانده خوفسیزلیک معمالری آشگن. اسلام آبادنینگ دعوا قیلیشیچه، ترور گروهلری افغانستانده جایلشگن و پاکستانگه قرشی ایشلهتیلیپتی. شونینگدېک، پاکستان هندستاننی حکومتی قرشی گروهلرنی قۉللب-قوّتلهیاتگنلیکده عیبلهیدی و طالبان افغانستاننی واسطهچی صفتیده ایشلهتهیاتگنینی بیلدیرهدی، بو عیبلاولرنی اېسه طالبان و هندستان دایما رد قیلگن.
