بیرلشگن ملتلر تشکیلاتینینگ تروریزمگه قرشی کورهش بۉلیمی سرپرستی الکساندر زوئفنینگ ایتیشیچه، افغانستاندهگی داعشنینگ خراسان بۉلیمی هنوز منطقه و اوندن تشقریده اېنگ جدّي تهدیدلردن بیری بۉلیب قالماقده.
او تیناوون (چهارشنبه،۱۵دلو) بیرلشگن ملتلر تشکیلاتی خوفسیزلیک کېنگشی ییغیلیشیده سۉزلر اېکن، افغانستانده داعش هجوملری سانی کمهیگن بۉلسه-ده، بو گروه، جملهدن آنلاین یاللش آرقهلی، اۉز صفلرینی تېزده قَیته تیکلش امکانیتینی سقلب قالهیاتگنینی تأکیدلهدی.
بیرلشگن ملتلر تشکیلاتینینگ تروریزمگه قرشی کورهش بۉلیمی سرپرستی اۉتگن آی کابلدهگی چین رستورانتیگه اویوشتیریلگن هجومنی مثال قیلیب کېلتیردی. مذکور هجوم اوچون جوابگرلیکنی داعش گروهی اۉز ذمّهسیگه آلگن اېدی.
او شونینگدېک یقین شرقدهگی وضعیتگه تۉختهلیب، داعش عراق و سوريهده همان فعال اېکنینی، اوشبو دولتلرنی بېقرارلشتیریش اوچون جدّي هجوملر و حرکتلر آلیب بارهیاتگنینی ایتدی.
مذکو رسمینینگ سۉزلریگه کۉره، سوريهدهگی وضعیت جوده نازک بۉلیب، داعش هنوز باشقروودهگی بۉشلیقلردن فایدهلنماقده.
چین و پاکستاننینگ خواطری
بیرلشگن ملتلر تشکیلاتی خوفسیزلیک کېنگشی ییغیلیشیده چین و پاکستان نمایندهلری افغانستانده ترورچیلر موجودلیگیدن خواطر بیلدیردیلر.
چین نمایندهسی کابلدهگی چین رستورانتیگه قیلینگن هجومگه اشاره قیلیب، افغانستانده ترورچیلر موجودلیگی مسألهسیگه جدّي یاندهشیش ضرورلیگینی تأکیدلهدی.
پاکستاننینگ بیرلشگن ملتلر تشکیلاتیدهگی نمایندهسی افتخار احمد اېسه طالبان افغانستانده قَیته حاکمیتنی قۉلگه آلگنیدن سۉنگ، «پاکستان طالبان حرکتی» و «بلوجستان آزادلیک اوردوسی» کبی ترورچی گروهلر ینه جانلنگنینی ایتدی.
اونینگ قۉشیمچه قیلیشیچه، بو گروهلر افغانستانده اېرکین فعالیت یوریتیب، اوشبو مملکت توپراغیدن فایدهلنیب پاکستانگه قرشی هجوملر اویوشتیرماقده.
منطقه و دنیا دولتلری آلدین هم بیر نېچه بار افغانستانده ترورچی گروهلر موجودلیگیدن خواطر بیلدیرگن و طالباندن اولرگه قرشی جدّي چارهلر کۉریشنی طلب قیلگن.
بیراق طالبان افغانستانده ترورچی گروهلر بارلیگینی رد اېتیب، داعش بو مملکتده باستیریلگنینی اَیتماقده.
