حاضرده طالبان نظارتیده بۉلگن افغانستان طبيعي آفتلر بیلن کورهشیش باشقرمهسینینگ معلوم قیلیشیچه، سۉنگّی بیر ییل دوامیده مملکتده ماین و پارتلاوچی مادّهلر پارتلشی عاقبتیده۸۷کیشی هلاک بۉلگن، ینه۳۳ کیشی جراحت آلگن.
مذکور اداره نینگ مطبوعات سۉزلاوچیسی محمد یوسف حماد بوگون، چهارشنبه (۱۵ دلو) نشر قیلگن ویدیوده قربانلر نینگ۶۷.۵ فایزی بالهلر اېکنینی ایتدی.
اونینگ سۉزلریگه کۉره، اوشبو قربانلر مملکت بۉیلب صادر بۉلگن۱۹۳ ته حادثه نتیجهسیده هلاک بۉلگن یاکه جراحتلنگن.
طالباننینگ طبيعي آفتلر بیلن کورهشیش باشقرمهسی سۉزلاوچیسی شونینگدېک، بیر ییل ایچیده۵۸کیلومتر یېر میدانی ماین و پارتلاوچی مادّهلردن تازهلنگنی،۲۴ مینگ۷۲۰ ته ماین و پارتلاوچی مادّه انیقلنیب، ضررسیزلنتیریلگنینی بیلدیردی.
حمادنینگ ایتیشیچه، حاضرده افغانستانده۱۵۵ ته ماین تازهلش گروهی فعالیت یوریتماقده و ایکّی میلیون۱۰۶ مینگدن آرتیق کیشیگه ماین همده پارتلاوچی مادّهلر خوفی حقیده توشونتیریش ایشلری آلیب باریلگن.
