بیرلشگن ملتلر تشکیلاتینینگ افغانستاندهگی نمایندهلیگی (یوناما) کابلده مخدرمادهگه قرشی ایشچی گروهینینگ تۉرتینچی ییغیلیشینی اۉتکزدی. اوشبو ییغیلیشده طالبلر نمایندهلری صنعی نرکوتیکلر بۉییچه خواطر بیلدیردی.
طالبلر تشقی ایشلر وزیرلیگینینگ مطبوعات سۉزلاوچیسی ضیا احمد تکل بوگون، چهارشنبه، ۱۵ دلو، اعلان قیلگن بیاناتیگه کۉره، ییغیلیشده گروهنینگ وزیرلیک نمایندهلری، خلق ارا و منطقوي تشکیلاتلر نمایندهلری، دیپلوماتلر همده متخصصلر اشتراک اېتگنینی، اولرنینگ اَیریملری آنلاین قتنهشگنینی ایتدی.
تکلنینگ تأکیدلشیچه، طالبان نمایندهلری گروه رهبرینینگ چارهسی نتیجهسیده افغانستانده خشخاش اېکیلیشی دېیرلی صفرگه توشگنی حقیده معلومات بېرگن.
شونینگدېک، ییغیلیشده اشتراکچیلر معیشت بدیل درآمد منبعلری و نرکوتیکدن اذیت چېکهیاتگنلرنی دوالش بۉییچه اۉز تکلیف و معمالرینی محاکمه قیلگن.
طالبلر نمایندهلری گرچه نرکوتیککه قرشی چاره-تدبیرلر عملگه آشیریلگن بۉلسه-ده، بو نتیجهلر بوتون منطقه و دنیا اوچون فایدهلی اېکنینی، اولرنی حمایه قیلیش اېسه مسوولیت، سرمایه و ایشانچگه اساسلنگن همکارلیکنی طلب قیلیشینی ایتگن.
تشقی ایشلر وزیرلیگینینگ مطبوعات سۉزلاوچیسی شونینگدېک، طالبلر صنعی نرکوتیکلر بۉییچه هم خواطر بیلدیرگنینی، اوشبو واسطهلر منبعی افغانستان تشقریسیده جایلشگنینی و اگر آلدی آلینمسه، نهفقط افغانستان، بلکه منطقه و بوتون دنیا ضرر کۉریشینی تأکیدلهگن.
بیرلشگن ملتلر تشکیلاتی و باشقه تشکیلاتلر نمایندهلری ییغیلیشده افغانستانده خشخاش اېکیشنی تعقیقلش فرمانیدن سۉنگ سېزیلرلی کمهییش کوزهتیلگنینی و بونی افغانستان تاریخیدهگی کتّه یوتوق دېب حسابلشگنینی ایتگن.
کۉپلب اشتراکچیلر اوشبو یوتوقلرنی سقلش اوچون دهقانلر اوچون معیشت بدیل درآمد منبعلری یرهتیش و نرکوتیک استعمالچیلرنی دوالش ضرورلیگینی تأکیدلهگن.
اېسلهتیب اۉتمیز، طالبلر 2022-ییل اپرېل آییده خشخاش یېتیشتیریش، ایشلب چیقریش، ساتیش و قاچاقینی تعقیقلهگن. بیراق کېینگی ییللرده بعضی حدودلرده خشخاش اېکیلیشی دوام اېتگن بۉلسه-ده، بیرلشگن ملتلر تشکیلاتی معلوماتلریگه کۉره، سېزیلرلی درجهده کمهیگن.
سۉنگگی ایکّی ییلده بدخشان و باشقه حدودلرده خشخاش میدانلرینی یۉق قیلیش طالبلرنینگ زۉرآورلیگی و محلي اهالی ناراضیلیگی بیلن یوزلشگن؛ بو زۉرآورلیکده بیر نېچه آدم هلاک بۉلگن.
بیرلشگن ملتلر تشکیلاتینینگ نرکوتیک و جنایتچیلیککه قرشی ادارهسی سۉنگگی سۉراو نتیجهلریگه کۉره، بدخشان، بلخ و قندوز ولایتلریده عایلهلر نینگ 85 فایزی خشخاش اېکیش نینگ معیشت بدیل درآمدیگه اېگه بۉله آلمهگن.
شونینگدېک، بیرلشگن ملتلر تشکیلاتی حساباتیده کۉرسهتیلیشیچه، افغانستانده نرکوتیک استعمالی اساسن عنعنوي واسطهلر بیلن باغلیق بۉلسه-ده، صنعی نرکوتیکلر و آپیایدلرگه بۉلگن طلب آرتماقده.
۱۲ دلو کونی اعلان قیلینگن گزارشگه کۉره، مخدر مادهگه بېریلگن اېرککلر نینگ 46 فایزی چرس، ۱۹فایزی اېسه تریاک ایشلهتهدی. «کا» تابلتسی ۱۱ فایز و متآمفتامین یاکه شیشه ۷ فایز استعمال قیلینهدی.
بیرلشگن ملتلر تشکیلاتینینگ بهالشیچه، نرکوتیک استعمالی کمبغللیک، ایشسیزلیک و مالیوي معمالر بیلن چنبرچس باغلیق. شونینگدېک، اشتراکچیلر جسماني آغریق، روحي توشکونلیک، عایلهوي معمالر و قرهملیک حقیده هم گپیرگن.
حسابات یکونیده تأکیدلنیشیچه، نرکوتیک استعمالی و کېنگ اجتماعي-اقتصادي باسیملر اۉرتهسیده کوچلی باغلیقلیک موجود.
