بیرلشگن ملتلر تشکیلاتینینگ افغانستاندهگی یاردم ادارهسی (یوناما)نینگ معلوم قیلیشیچه، افغانستان دنیاده اوروش قالدیرگن ماینلر و پارتلاوچی مادّهلر نتیجهسیده اېنگ کۉپ قربانلر رۉیخطیده اوچینچی اۉرینده تورهدی.
یوناما بوگون (سهشنبه،۱۳ دلو) بېرگن بیاناتیده، بالهلر بو تهدیدلرنینگ اېنگ کۉپ قربانلری اېکنینی تأکیدلهدی و اولرنینگ 80 فایزی قربان بۉلهدی. بالهلر کۉپینچه اۉینش وقتیده، پارتلنمهگن ماینلر یاکه باشقه حربي قالدیقلر بیلن علاقه نتیجهسیده جراحتلنهدی یاکه هلاک بۉلهدی.
یوناما ماینلردن تازهلش ایشلریگه مالیوي یاردم کۉرسهتیشنی خیریه تشکیلاتلریدن سۉردی. اولرنینگ ایتیشیچه، هر کونی بو تشکیلاتلر ماینلر و باشقه خوفلی اوروش قالدیقلرینی تازهلشگه حرکت قیلماقده و شو بیلن بیرگه، خبردارلیک دستورلری آرقهلی بوتون مملکت بۉیلب محلي جماعهلرنی موجود خوف حقیده اۉقیتماقده.
یوناما اۉز بیاناتیده اهالیگه شونی اېسلهتگن: شبههلی یاکه نامعلوم نرسهنی کۉرگنلریده درحال اونگه تېگمسلیکلری و زودلیک بیلن خبر بېریشلری کېرهک.
کۉپ ییللیک اوروشلر سبب، افغانستاننینگ اَیریم حدودلری ماینلر و پارتلاوچی مادّهلر بیلن افلاسلنگن بۉلیب، بو اهالینینگ حیاتیگه تهدید سالماقده.
«هلو ترست» انستیتوتی، ماینلردن تازهلش بیلن شغللنهدیگن تشکیلات، اۉتگن ییل هر آی تخمیناً۵۰ کیشی افغانستانده اوروش قالدیرگن ماینلر و پارتلاوچی مادّهلر نتیجهسیده هلاک بۉلیشی یاکه جراحتلنیشینی خبر قیلگن اېدی.
اوشبو تشکیلات معلوماتیگه کۉره، افغانستانده۶.۴میلیون کیشی پارتلاوچی مادّهلر خوفی آستیده یشهیدی.
بیرلشگن ملتلر تشکیلاتینینگ حساباتیگه کۉره،۳.۳میلیون کیشی افغانستانده ماینلر و پارتلاوچی مادّهلر بیلن افلاسلنگن منطقهلرگه بیر کیلومتر رادیوسده یشهیدی.
