طالباننینگ حج و اوقاف وزیری نور محمد ثاقبنینگ ایتیشیچه، جاري ییلده افغانستان حج زیارتچیلرینینگ عمومي خرجتلری 7 میلیارد 818 میلیون 307 مینگ 200 افغاني اېتیب بېلگیلنگن.
ثاقب بوگون (شنبه، 11 دلو) کابلده اۉتکزیلگن مطبوعات انجمنیده بو ییل افغانستاندن 30 مینگ زیارتچی حج زیارتیگه باریشینی، هر بیر زیارتچی اوچون سفر خرجتی اېسه 266 مینگ 400 افغاني اېتیب بېلگیلنگنینی ایتدی.
اونینگ قۉشیمچه قیلیشیچه، بو خرجت اۉتگن ییلگه نسبتاً 15 مینگ 690 افغانيگه کمهیگن.
اۉتگن ییلی هم افغانستاندن 30 مینگ کیشی حج زیارتیگه بارگن بۉلیب، طالبان حج وزیرلیگی معلوماتیگه کۉره، هر بیر زیارتچینینگ سفر خرجتی 282 مینگ افغانيدن آشگن اېدی.
مذکور وزیرلیک اۉتگن ییلی افغانستانلیک حج زیارتچیلرینینگ عمومي خرجتلری 8 میلیارد 287 میلیون 772 مینگ افغاني بۉلگنینی هم اعلان قیلگن.
طالبان نینگ حج و اوقاف وزیری بوگونگی مطبوعات انجمنیده، شونینگدېک، طالبان افغانستانده قَیته حاکمیتنی قۉلگه آلگنیدن سۉنگ، ایلگری حج زیارتی اوچون رۉیخطدن اۉتگن 87 مینگ 104 کیشی نوبتده قالیب کېتگنینی ایتدی.
اونینگ سۉزلریگه کۉره، سۉنگّی بیر نېچه ییل دوامیده اوشبو عریضهچیلر باسقیچمه-باسقیچ حج زیارتیگه یوباریلگن.
