تاجیکستان ملي خوفسیزلیک کمیتهسینینگ معلوم قیلیشیچه، افغانستانلیک اوچ «قاچاقچی» اوشبو مملکت چېگره قۉشینلری بیلن تۉقنهشووده اۉلدیریلگن.
خاور آژانسینینگ معلوماتیگه کۉره، تۉقنهشوو تیناوون (پنجشنبه، ۹ دلو) تاجیکستاننینگ ختلان ولایتی، شمسالدین شاهین اولسواللیگی، بهارک منطقهسیده صادر بۉلگن.
کمیتهنینگ معلوماتیگه کۉره، بېش «قاچاقچی» افغانستاندن تاجیکستانگه کیرگن، چېگره خادملرینینگ تسلیم بۉلیش بویروقلریگه بۉیسونمهگن و قوراللی قرشیلیک کۉرسهتگن همده افغانستانگه قاچیشگه حرکت قیلگن.
نتیجهده اوچ کیشی، اولر تخار ولایتی چاهاب اولسواللیگیدن بۉلگن اۉلدیریلگن، قالگن ایکّی کیشی اېسه تون قارانغیلیگیدن فایدهلنگن حالده افغانستانگه قاچیشگه موفق بۉلگن.
تاجیکستان ملي خوفسیزلیک کمیتهسینینگ خبر بېریشیچه، تۉقنشوو جاییدن اوچ ته کَلاشنکوف قورالی،۱۵۰ اۉق،۷۳ پاکت مخدر مادّه و باشقه جهازلر تاپیلگن و مصادره قیلینگن.
ختلان ولایتی تاجیکستان جَنوبیده، افغانستان بیلن چېگرهداش بۉلیب، سۉنگگی آیلرده بېقرارلیک و قوراللی تۉقنهشوولر کۉپهیگن منطقه حسابلنهدی.
تاجیکستان حکومتی بیر نېچه بار بو هجوملرنینگ افغانستان چېگره منطقهلریدن عملگه آشیریلگنینی معلوم قیلگن.
طالبان اوّلراق تاجیکستانگه هجوملر بارهسیده تېکشیروو آلیب باریلیشینی بیلدیرگن، اما حاضرگچه بو تېکشیروو نتیجهلری اعلان قیلینمهگن.
