آسترلیا تشقی ایشلر وزیرلیگینینگ معلوم قیلیشیچه، جاري ییلنینگ ۳۰-جونیدن سۉنگ اوشبو مملکتدهگی افغانستان اېلچیخانهسی فعالیتی تۉختهتیلهدی.
وزیرلیک بوگون (جمعه، ۱۰دلو) افغانستاننینگ کنبراهدهگی اېلچیخانهسی بیلن اعلان قیلینگن قۉشمه بیاناتده «افغانستان مسألهسیده اېلچیخانه یاکه آسترلیا حکومتینینگ موضعیگه پوتور یېتکزمهگن حالده، ترتیبلی و مناسب اۉتیش بۉییچه کېلیشووگه اېریشیلدی»، دېب تأکیدلهگن.
آسترلیا تشقی ایشلر وزیرلیگی اوشبو مملکت طالبان تامانیدن تعیینلنگن بیرار دیپلومات، فخري قنسول یاکه باشقه وکیلنی قبول قیلیش نیتیده اېمسلیگینی علیحده قید اېتگن.
شونینگدېک، وزیرلیک آسترلیا طالباننی افغانستان خلقینینگ قانوني نمایندهسی صفتیده تن آلمسلیگینی، انسان حقوقلرینینگ تیزیملی و دایمي روشده بوزیلیشینی، اینیقسه عیاللر و قیزلر حقوقلری همده مخالف آوازلرنینگ باستیریلیشینی کېسکین قارهلشینی بیلدیرگن.
آسترلیا تشقی ایشلر وزیرلیگی ویانا کانوانسیونسیگه موافق، ۳۰-جوندن کېین اېلچیخانه بناسی و اونینگ ملکینی حمایه قیلیشینی معلوم قیلگن.
افغانستاننینگ آسترلیادهگی اېلچیخانهسی حاضرگه قدَر اوّلگی حکومت تامانیدن تعیینلنگن دیپلومات وحیدالله ویسی تامانیدن باشقریب کېلینهیاتگن اېدی.
آلدینراق آسترلیانینگ « اسبیاس نیوز» اخبارات واسطهسی حکومت جناب ویسنی اونینگ ایشانچ یارلیغی کېلهسی ییل فبروری آییدن کېین اوزهیتیریلمسلیگی حقیده خبر بېرگنینی معلوم قیلگن اېدی. آسترلیا قاچقینلر کېنگشی اوشبو قراردن خواطر بیلدیرگن و اېلچیخانه یاپیلیشی عاقبتیده افغانستان یشاوچیلری ضرور شخصي حجتلرنی آلیش اوچون طالبان نظارتیدهگی ادارهلرگه مراجعت قیلیشگه مجبور بۉلیشینی تأکیدلهگن.
