اروپا اتفاقی کیچیک و اۉرته تجارتنینگ مالی منبعلرگه اېریشیشنی قۉللب-قوّتلش مقصدیده ۱۵ میلیون یورو سرمایه کیریتیشینی اعلان قیلدی.
اروپا اتفاقینینگ افغانستاندهگی نمایندهلیگی بوگون (پنجشنبه، ۹ دلو) ترقتگن بیاناتیده افغانستان تضمین اعتبار بنیادی (ACGF)بیلن همکارلیکده «افغانستانده تیریکچیلیکنی تأمینلش اوچون کیچیک و اۉرته تجارتلرنینگ (MSME) مالی منبعلرگه کیریشینی تأمینلش» لایحهسینینگ ایکّینچی باسقیچی ایشگه توشیریلگنینی معلوم قیلگن.
بیاناتگه کۉره، اوشبو لایحه مملکت بۉیلب تجارتلرنینگ کیفیتینی مستحکملش آرقهلی اقتصادي برقرارلیکنی آشیرهدی و برقرار تیریکچیلیکنی ترغیب اېتهدی.
اروپا اتفاقینینگ تأکیدلشیچه، ۲۰۲۵-ییلده موفقیتلی یکونلنگن بیرینچی باسقیچ یوتوقلریگه تهیهنگن حالده، ینگی باسقیچ برقرار مالیهلشتیریشنی جلب اېتیشنی یخشیلش اوچون ایشلب چیقیلگن.
اروپا اتفاقی نمایندهلیگی اوشبو باسقیچده یشیل و اقلیمي مالیهلشتیریش، قَیتیب کېلگنلر، قیشلاق خۉجهلیگی بیلن شغللنووچیلر همده عیاللر باشچیلیگیدهگی بیزنسلر، اینیقسه کم رواجلنگن حدودلرده، علیحده اعتبارده بۉلیشینی قید اېتگن.
اروپا اتفاقی هیاتی نینگ افغانستاندهگی همکارلیک بۉلیمی رهبری اریک بوم شوندهی دېگن، «اروپا اتفاقی افغانستانده اقتصادي اۉسیش و ایش اۉرینلری یرهتیشگه سرمایه کیریتیشگه صادق قالماقده. MALA لایحهسینینگ بیرینچی باسقیچی 55 مینگدن آرتیق ایش اۉرنینی قۉللب-قوّتلهدی و ۶۸ میلیون یورو مقداریده مالیهلشتیریشنی سفربر قیلدی.
ایکّینچی باسقیچ اېسه بوتون مملکت بۉیلب مقبول مالی منبعلرگه اېریشیشنی کېنگهیتیرهدی، بونده برقرارلیک، عیاللر و قیشلاق خۉجهلیگی بیلن شغللنووچیلرنینگ اشتراکیگه علیحده اعتبار قرهتیلهدی.»
