طالباننینگ عدلیه وزیرلیگی، اوشبو گروهنینگ جزایی اصولنامهسی بۉییچه تنقیدلرگه جوابن، طالبان قانونلریگه قرشی چیقیش شریعت نقطهی نظریدن جنایت حسابلنهدی و ناراضیلیک بیلدیرگن شخصلر محکمهگه تارتیلیشینی معلوم قیلدی.
وزیرلیک بوگون (چهارشنبه،۸ دلو) اعلان قیلگن بیاناتیده ایتیشیچه، طالباننینگ قانوني حجتلری قرآن، سنت و «حنفی فقهیگه عاید ایشانچلی کتابلر» اساسیده تیارلنگن.
بیاناتده شوندهی دېیلگن؛ «اسلامي امیرلیکنینگ قانوني حجتلریده شریعتگه ضد بۉلگن مادّهلر، بندلر یاکه حکملر موجود اېمس؛ اولر تۉلیق شریعتگه ماسدیر و اولرگه قرشی چیقیش – شریعتگه قرشی چیقیشدیر.»
عدلیه وزیرلیگینینگ قۉشیمچه قیلیشیچه، «اوشبو قانونلرگه قرشی چیقیش شریعت و علمي اساسگه اېگه اېمس، او جهالت یاکه بېفراصتلیکدن کېلیب چیقهدی و شریعت نقطهی نظریدن جنایت حسابلنهدی. ناراضیلر محکمه و عدلیه اۉرگانلریگه جوابگرلیککه تارتیلهدی.»
سۉنگّ ی وقتلرده طالبان رهبری اوشبو «محکمهلر جزایی اصولنامهسینی» تصدیقلهگن.
اوشبو اصولنامهنی تطبیق قیلیش کېنگ عکسالعمللرگه سبب بۉلگن؛ تورلی سیاسي آقیملر نتیجهلرینی خواطرلی دېب بهالهگن.
رواداري انسان حقوقلری تشکیلاتینینگ بیان قیلیشیچه، اصولنامه حنفی مذهبی طرفدارلری تشقری باشقه مسلمانلرنی «بدعتکار» دېب اتهب، اجتماعي طبقهلشتیریش و قوللیکنی قانونيلشتیرگن.
شونینگدېک، اصولنامهده عیاللر و بالهلرگه نسبتاً زۉراورلیک فقط آغیر جسماني شکللر بیلن چېکلنگن، روانی و جنسي زۉرآورلیک اېسه تعقیقلنمهگن.
روادارينینگ بیان قیلیشیچه، اصولنامهده طالبانگه قرشی چیقهدیگنلر «باغی» دېب اعلان قیلینگن و اولرنی اۉلدیریش بویوریلگن.
تشکیلاتنینگ فکریچه، اصولنامه عدالتلی محکمهنینگ اساسي تمایللرینی بوزهدی و اۉز اختیاریده حبسگه آلیش و قییناقلر خوفینی آشیرهدی.
